اسلام آباد۔ 15نومبر (اے پی پی) وزیر مملکت داخلہ شہریار خان آفریدی پارینے کہ خیبر پختونخوا نا ایس پی طاہر خان داوڑ شہید ءِ 26اکتوبر آ اسلام آباد آن برمتہ کننگا، اودے مہالو ہم دھڑکو ملاکہ، اونا خاہوت ملوک آ دھڑکو تا سوب اسلام آباد آ بسوسر، وزیراعظم اودے شہید کننگ نا واقعہ نا انکوائری رپورٹ ءِ بٹنگانے، داواقعہ نا ڈوہ اوغانستان اٹی مرے یا پاکستان اٹی اودے عبرت نا نشان اس جوڑ کننگک۔ اسلام آباد اٹی سیف سٹی ڈٹ انا 600 آن زیات کیمرہ کاریم ہی کننگ اٹی افس، داڈٹ انا پورو جاست وپاست ءِ کرفنگک۔ پنچ شنبے نادے ایوان بالا ٹی پالیسی بیان ترسا شہریار خان آفریدی پارے کہ طاہر داوڑ نا شہیدی نا واقعہ بے کچ است ہسون و تکلیف دہ ءِ داڑآن کانود نافذ کروک آ ادارہ غاتا کچ ءِ ودفنگ و خاص وڑاٹ پولیس نا بابت سوج انا نشان اس تالان مرسا مون آ بریک۔ طاہر خان داوڑ شہید پاکستان نا غیر ت مند ءُ مار اسے، اوڑا مہالو ہم اِرا وار خودکش جلہو مس، اونا جان ءِ داخہ در خلیس اس کہ او ہفت سال خیبر پختونخواہ غان پیشن ئس و 2017 ء ٹی اونا خاہوت منتقل مرسا بہارہ کہوآ بسر ، اونا اسہ ایلم و بھابی اسے ہم شہید کننگا۔
