اسلام آباد۔ 15نومبر (اے پی پی) وزیر خارجہ شاہ محمود قریشی براعظم افریقہ تون خڑکی واپاری، کمرشل و زرکاری تعلقداری تے ودفنگ نا حکومتی وژن ءِ تالان کرساپارے کہ افریقی ملک آتون تعلقداری تے ٹی ترندی اتون ودکی ساڑی آ حکومت نا خارجہ پالیسی تا اہم ءُ تمبہ اسے۔ داہیت ءِ او تدوک آ دے دفترخارجہ ٹی افریقی گروپ نا ہائی کمشنر ز و سفیر آتا اسیجا دیوان اٹی گپ و تران کرسا پارے۔ دفترخارجہ ناترجمان نا رداٹ سویلی افریقہ، تیونس، کینیا، الجیریا، صومالیہ ، سوڈان ، مراکش ، ماریشیس ، نائجیریا ، مصر و لیبیا نا سفیر و ہائی کمشنر آک وزیر خارجہ تون مریس و سرجم ہیت وگپ انا وخت تننگ آ منت واری ءِ ہرفیر۔ اوپاریر کہ پاکستان ڈیہہ نا اہم ءُ ملک اسے وخت اس کہ پاکستان و افریقی ملک آتا نیام اٹ تعلقداری تین پہ تینی عزت و شرف نا بنداو تیاٹی ءِ۔ سفیر آک پاریر کہ ہڑتوم آ کنڈآتا تعلقداری تے ٹی ترندی اتون ودکی کن بڑزکو کہول و کاروباری ڈل آتا ہن وبر نا گرج ءِ۔ وزیر خارجہ پارے کہ ہڑتوم آ کنڈآتا خوشگوار تعلقداری تے واپاری، اقتصادی و زرکاری تعلقداری تے ٹی بدل کننگ و چندی بشخ آتے ٹی کمکاری ءِ ودفنگ کن ہروڑ کوشست آتے برجاتخنہ۔
