اسلام آباد۔ 14نومبر (اے پی پی) بنجائی وزیر نیشنل فوڈ سیکورٹی اینڈ ریسرچ صاحبزادہ محبوب سلطان پارینے کہ ساڑی آ حکومت ملک اٹی کشاری انقلاب و بزغر تا حالیت ءِ گچین جوڑ کننگ کن پرعزم ءِ۔ اوداہیت ءِ پاکستان اٹی بیلاروس نا سفیر آندرے ارموچ تون ہیت وگپ کرسا پارے ہراچارشنبے نادے داڑے اوڑتون اوڑدہی کرے۔ بیلا روس نا معاشی قونصلر ولادی میر پایا سویوہم اوڑتون اوار ئس۔ اوڑدہی ٹی ہڑتوم آ کنڈآن کشاری کمکاری نا معاملہ غاتیا شرہ مس۔ بنجائی وزیر پارے کہ پاکستان کشاری ءُ ملک اسے و ساڑی آ حکومت ملک اٹی کشاری انقلاب و بزغر آتا حالیت ءِ گچین جوڑ کننگ کن پرعزم ءِ، ہڑتوم آ ملک آتے ٹی کشاری شونداری کن چندی ایم اویوز آ مست آن دستخط مسنے۔ بنجائی وزیر مشترکہ ورکنگ گروپس نا آخبت نا اڈ ہلوک آ 5می دیوان نا بارواٹی ہیت کرے ہرانا بروک آ سال فروری ٹی اڈ ہلنگ نا گمان ءِ۔ بنجائی وزیر پارے کہ وزارت بیلا روس نا کشاری وزیر ءِ پاکستان نا دورہ نا سلہ نا ڈٹ بندی کرینے تانکہ ہڑتوم آ کنڈآن ٹیکنالوجی، مشینری ، ڈیری پروسیسنگ و بج انا بدلی نا بشخ آتے ٹی کمکاری ءِ مون آ دننگ دوئی مرے۔ بیلا روس نا سفیر بنجائی وزیر ءِ معلومدار کرے کہ ڈیری مصنوعات آتے ٹی بیلا روس ارٹ میکو نمبر آٹی ءِ و پاکستان اوڑآن فائدہ ہرفنگ کیک۔ بنجائی وزیر پارے کہ پت انا قابل ٹریکٹر و ایلو کشاری مشینری /اطلاق نا بارواٹ ڈٹ بندی کننگ مریک ۔ دیوان اٹی بنجائی سیکرٹری این ایف سی اینڈ آر ، وزارت و پی اے آرسی نا بڑزکو کمامدارآک ہم ساڑی ئسر۔
