کوئٹہ۔ 14نومبر (اے پی پی) بنجائی وزیر ریلوے شیخ رشید احمد پارینے کہ بلوچستان حکومت گوادر اٹی ریلوے اسٹیشن نا جوڑ کننگ کن سد آ ایکڑ ڈغار فراوان کرینے، وزیراعظم عمران خان تینا گوادر نا دورہ ٹی گوادر ریلوے اسٹیشن نا بناءِ کیک، اکبر بگٹی ایکسپریس نا کرایہ ءِ کم و ایئر کنڈیشن اوٹی ایئر کنڈیشن خلکونن، کنکن شرف نا ہیت اسے کہ گورنر سندھ عمران اسماعیل و بنجائی وزیر آبی وسیلہ فیصل واوڈا کنا خواست آ کوئٹہ ریلوے اسٹیشن نا دورہ ءِ کرسا کنا شرف ءِ کرینو۔ داخیال آتا درشانی ءِ او چارشنبے نادے گورنر سندھ عمران اسماعیل و بنجائی وزیر آبی وسیلہ فیصل واوڈا تون اوار کوئٹہ ریلوے اسٹیشن آ صحافی تتون ہیت وگپ کرسا کرے۔ بنجائی وزیر ریلوے شیخ رشید احمد پارے کہ پاکستان ریلوے ٹی ٹریکنگ سسٹم و وائی فائی خلنگ تون اوار ریلوے نا ریونیو ٹی اسہ ارب نا ودکی کرینن، 2مال بردار گاڈی چلیفنگ نا 25دسمبر آن مست بنامریک ننا ٹریک 70 سال متکن ءِ، وزیراعظم عمران خان پاکستان ریلوے ٹی 10 ہزار خلقت ءِ نوکری تننگ نا منظوری ءِ تسنے، کنا مسخت کمیشن و مال جوڑ کننگ نا اف بلکن وزیراعظم عمران خان نا ویژن نا رداٹ الس ءِ ریل انا گچین آسراتی تا فراوانی ءِ، اوپارے کہ ڈپٹی اسپیکر قومی اسمبلی قاسم خان سوری اولیکو وار ایوان اٹی گچین مرسا بسنے، بطور ڈپٹی اسپیکر اونا کارکڑد است بڈ ءِ ، نن اینو کوئٹہ ٹی اونا لمہ نا کزیت کن بسونن۔
