کوئٹہ۔ 14نومبر (اے پی پی) بنجائی وزیر آبی وسیلہ فیصل واوڈا پارینے کہ بلوچستان سندھ آبی جھیڑہ غاتے زوت ایسر کننگک، 18 می ترمیم آ ہیت کیوہ تو گڑاس بندغ ءِ خراب لگک، ننے تعصب آن ایڑتر مرسا چلینگوئی مریک، پبلک پرائیویٹ پارٹنر شپ آ باور کیوہ۔ داہیت ءِ او چارشنبے نادے آ گورنر سندھ عمران اسماعیل و بنجائی وزیر ریلوے شیخ رشید احمد تون اوار کوئٹہ ریلوے اسٹیشن نا دورہ غان پد صحافی تتون ہیت وگپ کرسا پارے، بنجائی وزیر آبی وسیلہ فیصل واوڈا پارے کہ صوبائی حکومت نا درخواست آ کوئٹہ ٹی غیر فعال اِراپلانٹ ءِ بحال کننگ و انٹرنیشنل سروے کن واپڈا کمامدارآتے ہڑدڑی بنداو تیا پارت جاری کیوہ اوپارے کہ مستین اٹی بلوچستان ءِ اہمیت تننگ نا جاگہ غا گوجالنگا ولے داسہ پوسکن آ پاکستان اٹی دُن مفک۔ بلوچستان نا ویل آتا ایسری کن صوبائی حکومت تون اواری اٹ کاریم کینہ ، بنجائی وزیر فیصل واوڈا بلوچستان نا الس ءِ باوری ترفے کہ وزیراعظم عمران خان نا سرکڑدہ ہی ٹی بنجائی حکومت اوفتا مستین نا محرومی تا ازالہ ءِ کرسا صوبہ ٹی جاری شونداری عمل ءِ پین ترند کیک۔
