مردان۔ 14نومبر (اے پی پی) پاکستان تحریک انصاف نا راہشون و راجی شخصیت حمزہ خان و امیر زیب خان پوہان کالونی بغداد ہ مردان اٹی اسہ عشائیہ دود اسے نا بست وبند کریر ہراٹی اسپیکر قومی اسمبلی اسد قیصر، مسکوہی گورنر اویس غنی، صوبائی اسمبلی نا باسک عبدالسلام آفریدی، امری فرزند خان ، ملک شوکت، باسک قومی اسمبلی مجاہد خان، پنی ٹرانسپورٹر حاجی شاہ سید آفریدی و تحریک انصاف نا ہندی کارندہ غاک ساڑی ئسر۔ داوخت آ پاکستان تحریک انصاف نا بنجائی و صوبائی حکومت نا کارکڑد نا ستاءِ کننگا و الس نا اومیت آتیا پورو سلنگ کن پین گام گیج آتا اعادہ کننگا وخت اس کہ ساڑی آ ضمنی گچین کاری تے ٹی عبدالسلام آفریدی نا سرسہبی آ کارندہ غاتے خراج عقیدت پیش کننگا۔ اسپیکر قومی اسمبلی اسد قیصر ساڑی مروک آتون ہیت وگپ کرسا پارے کہ تحریک انصاف قوم انا اومیت آتیا پوروسلک و ملکی معیشت ءِ سیبو تننگ کن پبی گام گیج چست کننگک۔ اوپارے کہ مسکوہی حکمرانک الس نا شرحالی نا جاگہ غا تینا تجوری تے پُرکریسر وخت اس کہ تحریک انصاف جوان وڑاٹ الس نا خذمت ءِ کیک۔
