بیجنگ/اسلام آباد۔ 14نومبر (اے پی پی) پاکستان و چین نا نیام اٹ بس سروس تینا اولیکو سفر ءِ پورو کرینے، دا بس سروس ہڑتوم آ ملک آتا نیام اٹ رابطہ غاتا مون آ دننگ کن بناکننگانے۔ بس سروس تینا اولیکو سفر ءِ لاہور آن بناکرے و دانا مزل چین نا صوبہ سنکیانگ نا شار کاشغر ئس۔ بس سروس پاکستان ٹوررازم ڈویلپمنٹ کارپوریشن نجی ٹرانسپورٹ شجاع ایکسپریس نا کمک اٹ بناکرینے۔ بس سروس ہفتہ ٹی چار دے ہفتہ آن پنچ شنبے اسکان چلیفنگک۔ شجاع ایکسپریس نا چیف ایگزیکٹو آفیسر محمد عامر پارے کہ لاہور آن کاشغر نا سفر 36گھنٹہ ٹی پورو مریک۔ چین نا سیم اسکان دانا 5 اشٹاپ ءُ ۔ بس انا کمک اٹ سفر کروک آتون ویزہ و شناختی کارڈ تخنگ المی ءِ۔ لاہورآن کاشغر اسکان دا نا کرایہ 13ہزار پاکستانی روپئی ءِ وخت اس کہ راؤنڈ ٹرپ انا کچ 23 ہزار روپئی مقرر کننگانے۔ پاکستان ٹوررازم نا کارندہ مختارعلی میڈیا ءِ پارے کہ دا بس سروس نا کمک اٹ چینی سیل و سواتی تے پاکستان اٹی بدھ مت نا تاریخی ہند آتسکان رسینگ نا موقع ہم فراوان مریک۔
