اسلام آباد۔ 13نومبر (اے پی پی) وزیراعظم عمران خان پارینے کہ حکومت وزارت دفاعی پیداوار نا گرج آتے پورو کننگ کن ہر وڑ کمک فراوان کیک، دا بشخ انا لائخی تیان پبی فائدہ ہرفنگ کن وزارت دفاعی پیداوار نا چندی سرجز آتے ٹی نجی بشخ ءِ اوار کننگ آ خصوصی چکار کننگ نا گرج ءِ، گوادر شپ یارڈ انا جوڑ کننگ کن بنجائی حکومت پورو کمک فراوان کیک۔ اوداہیت ءِ سے شنبے نادے وزیراعظم آفس اٹی وزارت دفاعی پیداوار نا بارواٹی بریفنگ نا کماشی ءِ کرسا پارے۔ دیوان اٹی وزیر دفاعی پیداوار زبیدہ جلال، وزیراعظم نا خصوصی کمکار افتخار درانی، سیکرٹری دفاعی پیداوار لیفٹیننٹ جنرل (ر) محمد اعجاز چوہدری و سینئر آفیسر آک ساڑی ئسر۔ سیکرٹری دفاعی پیداوار وزیراعظم ءِ وزارت و اوڑتون گنڈوک ادارہ غاتا فرض و کارکڑد آ سرجم معلومدار کرے۔ دیوان اٹی وزارت آن تعلقدار ایلو معاملہ غاتیا ہم خیال آتا درشانی ءِ کننگا۔ وزیراعظم عمران خان وزارت دفاعی پیداوار و اوڑتون گنڈوک ادارہ غاتا کارکڑد نا ستاءِ کرسا پارے کہ ملک انا دفاعی گرج آتے پورو کننگ تون اوار اوار کمرشل و ایلو راجی سرجز آتا بشخ آتے ٹی دوئی مرو ک آ سرسہبیک ستاکڑزرہ ۔
