اسلام آباد ۔ 13نومبر (اے پی پی) صدر مملکت عارف علوی ہموبندیک، ہرافک تینا قید انا مد ءِ پورو کرینو ولے اسہ لکھ روپئی آن کم جرمانہ نا تفننگ نا سوب آن جیل آتے ٹی ءُ، کن غٹ گورنر آتے فنڈ انا قیام نا پارت کرینے۔ صدر مملکت غٹ گورنر آتیان دارداٹ دُن انگا غٹ بندی تا ڈیٹا ءِ یکجا کننگ نا پارت کرینے تانکہ داعمل ءِ گچین وڑاٹ بنا و پورو کننگ مرے۔ صدر مملکت داہیت ءِ سے شنبے نادے داڑے گورنر کانفرنس نا کماشی ءِ کرسا پارے۔ داوخت آ ہر چار آ صوبائی گورنرآک و گورنر گلگت بلتستان ہم ساڑی ئس۔ صدر مملکت گورنر آتے جیل آتے ٹی غٹ بندی تے کُننگ کن ساف دیر انا فراوانی نا زمواری ءِ ہرفنگ و جیل آتے ٹی بندی و پویس کارندہ غاتے ٹی زردوئی نا تشخیص کن لیبارٹری تا جوڑ کننگ نا پارت ہم کرے۔ صدر مملکت سندھ انا وڑاٹ مچ آ ملک اٹی سٹیزن پولیس لیژان کمیٹی تا ٹہیفنگ نا گرج آ زور شاغا۔ صدر مملکت گورنر آتیا زور شاغا کہ او دیر، بہبود آبادی، جان جوڑی ، و بنائی ، ثانوی و آب اٹ تعلیم نا بشخ آتون وابستہ ویل آتا ایسری ٹی قائدانہ کڑد ادا کیر ۔ صدر پارے کہ غٹ گورنر آتے تینا تعلقدار صوبہ غاتے ٹی تعلقدار وزارت آتون اواری اٹ وزیراعظم پاکستان نا کلین اینڈ گرین پاکستان آ عمل کننگ کن گام گیج کروئی مرے۔ دیوان اٹی گورنر خیبر پختونخوا چاگڑد نا رکھ اکن زیتون نا دسنگ نا سلاہ و سوج ءِ پیش کرے۔
