اسلام آباد۔ 13نومبر(اے پی پی) وزیر مملکت مواصلات و پوسٹل سروسز مراد سعید پارینے کہ مچ آ ملک انا 13 ہزار ڈاکخانہ و 43ہزار ملازم پاکستان نا قومی خزانہ ٹی سالانہ 100 ارب روپئی ریونیو جمع کرفرہ، ڈیجیٹل پوسٹل نا رداٹ آن لائن (ای منی آرڈر) 50 ہزار روپئی اسکان پیسہ غاتا ترسیل ہمودے اُرانا درگہ غا سرکننگ نا آسراتی ءِ بناکننگانے۔ داخیال آتا درشانی ءِ مراد سعید سے شنبے نادے آ جی پی او اسلام آباد اٹی دود آن تران آن پد میڈیا تون ہیت وگپ کرسا کرے۔ اوپارے کہ محکمہ ڈاک اٹی گدرینگوک آ حکومت آک پلنگ و رزاک اٹ اودے تباہ و برباد کننگا ہراڑآن دا محکمہ نا سالانہ نسخان 10 ارب اسکان سرمس۔ وزیراعظم عمران خان ننے دا ہیل تس کہ ادارہ غاتا سہی سمت انا تعین ءِ کننگے و گڑاس کننگ کن کوشست کننگے تو ہچ ءُ کاریم اس ممکنات آتیان اف۔ اوپارے کہ مچ آ ملک اٹی ہراکہ بھلانیٹ ورک محکمہ ڈاک خانہ جات تون ءِ پین سروس اسے تون اف، 13ہزار ڈاکخانہ ملک انا داکنڈ و اے کنڈ اٹ تالان ءُ ہرافتا 43ہزار ملازم چائنہ بارڈر تون آخیری خلقت آن ہلیس ایلوخلقی و شاری آ علاقہ غاتے ٹی تینا خذمت ءِ سرانجام تننگ ءُ۔ اوپارے کہ اِراہفتہ ٹی نن محکمہ نا تہٹی اِرا سروس نا بناءِ کرین تو ریونیو ٹی 58 ملین روپئی نا ودکی مس۔ اوپارے کہ محکمہ ڈاک تینا نیٹ ورک آن فائدہ ہرفسا 93جی پی اوز تے ٹی ترسیلات زر اکن الیکٹرانک منی آرڈر سسٹم نا بناءِ کرینے، بنائی وڑاٹ دا آسراتی 25شار تیٹی میسر مریک، اوپارے کہ مارکیٹ اٹی 135ارب نا کمرشل پوٹینشل ساڑی ارے۔ محکمہ نا تہٹی خرابی و جوانی تا بابت سرجم آتے بٹنگ انگانے۔ زوت اسے اٹ دا محکمہ قوم و ملک انا فخر جوڑ مریک۔
