اسلام آباد۔ 13نومبر (اے پی پی) معذور بندغ آتا بحالی نا قومی ادارہ (این آئی آر ایم) اٹی سی ٹی سکین مشین نا بناءِ کننگا۔ سے شنبے نادے آ نیشنل ہیلتھ سروسز ریگولیشنز اینڈ کوآرڈینیشن نا بنجائی وزیر عامر محمود کیانی بناءِ کرے۔ داوخت آ وزارت نا سینئر کمامدارو ادارہ نا بڑزکو آفیسر آک ہم ساڑی ئسر۔ داوخت آ ہیت وگپ کرسا بنجائی وزیر عامر محمود کیانی پارے کہ این آئی آر ایم نا کارکڑد ہردے نا بنداو آ مانیٹرنگ کننگ اُن، اودے گچین ءُ ادارہ اس جوڑ کننگک تانکہ الس داڑآن زیات آن زیات فائدہ ہرفنگ کے۔ اوپارے کہ بنجائی حکومت الس ءِ تعلیم و جان جوڑی تون اوار بنداوی آسراتی تا فراوانی کن کوشست کننگ ءِ۔ وزیراعظم عمران خان پارت کرینے کہ بنجائی دارالحکومت اسلام آباد ءِ مچ آ ملک اکن ماڈل جوڑ کننگک ۔ وزیراعظم نا ویژن نا رداٹ الس ءِ تعلیم و جان جوڑی نا پوسکن آ آسراتی تا فراوانی ٹی حکومت ہر حد اسکان کاہک۔ داوخت آ ایگزیکٹو ڈائریکٹر فضل مولا پارے کہ بنجائی وزیر داوخت اسکان 3 وار ہسپتال نا دورہ ءِ کرینے و اونا پارت آ پوسکن آ سٹی سکین مشین اس نصب کننگانے۔ بنجائی وزیر غٹ مشین و سسٹم ءِ اپ گریڈ کننگ نا پارت کرینے۔ ہسپتال اٹی اوٹی تون اوار چندی بشخ آتے کن پوسکن ءُ مشین ہلنگ انگ ءِ۔ دا ادارہ مچ آ ملک اکن مثال اس مریک۔
