اسلام آباد۔ 13نومبر (اے پی پی) بنجائی وزیر سائنس و ٹیکنالوجی اعظم خان سواتی پارینے کہ اسہ قوم اس ہم سائنس و ٹیکنالوجی و پٹ وپول اٹی پیش رفت آن بیدس شون ہلنگ کپک، زوت اسے اٹ ملک انا چندی شار تے ٹی شش سائنس پارک جوڑ و سائنس و ٹیکنالوجی کن بجٹ اٹی ودکی کینہ، میرٹ ءِ اولیت تننگک، غٹ ادارہ غاتے ٹی پوسکن ءُ بندغ خالص میرٹ نا بنداو آ الینہ، کرپشن اسہ ناسور اسے اودے ماس آن کشنگ ننا منشورنا بشخ ءِ، ننے چین نا آزموندہ غاتیان فائدہ ہلنگ نا گرج ءِ۔ داخیال آتا درشانی ءِ او سے شنبے نادے پاکستان سائنس فاؤنڈیشن نا کنڈآن سائنس نا جہانی دے انا وخت آ دود آن تران کرسا کرے۔ بنجائی وزیر داوخت آ مہمان خاص ئس وخت اس کہ پاکستان اٹی یونیسکو نا ڈائریکٹر وائی بیک جنسن گیسٹ و آف آنر ئس۔ دود آن تران کرسا بنجائی وزیر پارے کہ داسال ’’سائنس انسانی حق‘‘ انا سرحال آ سائنس انا جہانی دے ءِ اڈتننگ انگ ءِ ہرا داہیت انا متقاضی ءِ کہ سائنس انا فائدہ غاتے جہانی کہول آ غٹ انسان تسکان گدریفنگے و غٹ ملک آتے ٹی پائیدار اقتصادی شونداری کن سائنس و ٹیکنالوجیی آن پبی فائدہ ہرفنگے۔ اوپارے کہ راج انا شونداری و خذمت کن ایڈوانسگ سائنس انا تصور و اہمیت ءِ تالان کننگے۔ بنجائی وزیر پاکستانی سائنس دان ڈاکٹر عطاء الرحمان، ڈاکٹر ثمر مبارک مند و ڈاکٹر اشفاق نا خذمت آتے خراج تحسین پیش کرسا پارے کہ نئے بیرہ پاکستان بلکن شون ہلوک ملک آتے کن اوفتا خذمت آک ستاکڑزہ۔ اوپارے کہ ننے سائنس نا مثبت دروشم ءِ تالا ن کننگ و غٹ دنیا ٹی امن و ایمنی ءِ مون آ دروئی مریک۔ مستین اٹی ورناچین ءِ پورو وڑاٹ گوجالنگاسس ولے ساڑی آ حکومت اوفتا لائخی تے کاریم اٹ اتنگ و اوفتے وارخواہی تننگ نا فیصلہ کرینے۔ اوپارے کہ پاکستان اٹی داوخت آ ہچ ءُ سائنس پارک اس اف وخت اس کہ ایران و کوریا ہم دا چرجوئی ٹی ننے آن مون آٹی ءُ۔ اوپارے کہ زوت اسے اٹ پاکستان نا جتا شار تے ٹی شش سائنس پارک جوڑ کننگک و وزارت سائنس و ٹیکنالوجی نا بجٹ ءِ ودفنہ۔ اوپارے کہ ورناچین ہر قوم اکن مخ انا ملی نا حیثیت تخرہ۔ اگہ نن داڑآ زرکاری کرینہ تو اینو پاکستان شون ہلوک ملک آتا صف اٹی سلیسکہ۔ اوپارے کہ میرٹ ساڑی آ حکومت نا اولیت آتے ٹی اوار ءِ ، غٹ ادارہ غاتے ٹی خالصتا میرٹ نا بنداو آ تعیناتی تے المی جوڑ کینہ۔ اوپارے کہ سائنس انوویشن اٹی نن ایلو ملک آتیان بھاز پدی اُن، علم پٹ وپول انا پن ءِ ہرا نن تون بھاز کم ءِ ۔ دود آن پی ایس ایف نا چیئرمین ڈاکٹر قیصر مجید ملک ، صدر پاکستان اکیڈمی آف سائنس ڈاکٹر محمد قاسم جان و صدر ای سی او سائنس فاؤنڈیشن ڈاکٹر منظور حسین سومرو تون اوار ایلو ترانکار آک راج و معیشت نا شونداری کن سائنس انا اہمیت ءِ تالان کریر۔
