لاہور۔ 12نومبر (اے پی پی) بنجائی وزیر مذہبی امور پیر نور الحق قادری پارینے کہ کائنات نا ہر ذرہ کن نبی ﷺ ءِ رحمت اللعالمین جوڑ کرسا گدریفنگا، حضور ﷺ نا ذکر مبارک غٹ ذکر آتیان زیات افضل ءِ، خواجہ ﷺ نا اسوہ حسنہ غا عمل کرسا ہی نن دنیا و آخرت اٹی سرسہبی دوئی کننگ کینہ۔ داخیال آتا درشانی ءِ او دی یونیورسٹی آف فیصل آباد لاہور کیمپس اٹی سیرت النبی ﷺ کانفرنس آن تران کرسا کرے۔ بنجائی وزیر پارے کہ حضور ﷺ نا فرمان ءِ کہ علم انا ہیت ہراکان کہ ملے اودے حاصل کبو، خواجہ ﷺ نا شخصیت رحمت ہی رحمت ءِ۔ اوپارے کہ ہراوخت اسکان داملک اٹی ریاست مدینہ نا بنداوآک بفسہ سرسہبی مننگ کپک، ذات مصطفی تون وابستگی بیرہ آخرت ہی آخا بلکن دنیا ٹی ہم سرسہبی نا ضمانت ءِ، بنجائی وزیر پیر نور الحق قادری پارے کہ اللہ تعالیٰ حضور ﷺ ءِ انسان آتا کنڈآ داخاطرآن گدریفیسس تانکہ دین مچ آ دنیاٹی تالان مرے، اگہ خواجہ نا ذات متوکہ تو دا کائنات جوڑ ہی کننگتوکہ، فتہ فساد نا دوراٹی نبی ﷺ صلح حدیبیہ کرے، اوپارے کہ نبی ﷺ نا ذات غٹ آن زیات انسانی زند ءِ بدلیفے، نبی ﷺ نا ناموس آ مدام ہیت کیوہ و کرسا کیوہ، خواجہ ﷺ ءِ غٹ جہان تے کن رحمت اللعالمین جوڑ کرسا گدریفنگا، خواجہ ﷺ ہرانگیا کہ ہنا امن نا کلہو ءِ درے، خلقت ءِ ہندن ءُ دین اس ہیل تس ہراٹی جنگ انا ہم ادب آتے ہیل تننگا۔ او جنگ انا حالیت آتے ٹی ہم اخلاق نا درس تس، دا دین زالبول ءِ لمہ، ایڑھ و مسڑ نا بھلو رتبہ اس تس۔ داوخت آ پروفیسر یوسف عرفان، اعجاز چوہدری، ارشاد احمد، عارف، جسٹس (ر) نذیر احمد غازی، ڈاکٹر نوید اظہر ، پروفیسر یوسف عرفان، پروفیسر عصمت اللہ زاہد ، ڈاکٹر طاہر حمید تنولی، و محبوب قادر شاہ و ایلوفک کانفرنس آن تران کریر۔
