اسلام آباد۔ 12 نومبر (اے پی پی) وزیراعظم عمران خان پارینے کہ بنجائی دارالحکومت اٹی لینڈ مافیا ءِ اسُل سگنگ پننگک، نیزگار تا ڈغار تیا ناجائز کوزہ کروک و لینڈ مافیا نا برخلاف آپریشن الس و میڈیا ءِ اوار درسا مون آ ہِننگے وخت اس کہ وزیراعظم اسلام آباد اٹی لینڈ مافیا، ڈرگ ڈیلرز و خاص کر تعلیمی ادارہ غاتے ٹی منشیات نا کاریم اٹ اتنگ نا برخلاف جاری مہم ءِ پین جوان کننگ و اودے گچین جوڑ کننگ کن کوآرڈینیشن کمیٹی اسے نا ٹہیفنگ نا فیصلہ کرینے۔ وزیراعظم عمران خان نا کماشی ٹی بنجائی دارالحکومت نا تعلقدار معاملہ غاتا بابت بڑزکو کہول انا دیوان دوشنبے نادے آ اڈ ہلک۔ دیوان اٹی وزیر مملکت داخلہ شہریار خان آفریدی، وزیراعظم نا خصوصی کمکار علی نواز اعوان، ایم این اے راجہ خرم نواز، سیکرٹری داخلہ میجر (ر) اعظم سلیمان ، چیف کمشنر اسلام آباد، آئی جی پولیس و ایلو سینئر آفیسر آک ساڑی ئسر۔ سیکرٹری داخلہ وزیراعظم عمران خان ءِ بنجائی دارالحکومت نا جم اٹنگا حالیت، امن و ایمنی، کوزہ مافیا نا برخلاف جاری آپریشن و ایلو معاملہ غاتیا سرجم احوال تس۔ وزیراعظم عمران خان وزیر مملکت شہریار خان آفریدی، خصوصی کمکار علی نواز اعوان و ایم این اے راجہ خرم نواز ءِ اسلام آباد کن خصوصی پیکج اس تیار کننگ نا پارت کرے وخت اس کہ اسلام آباد اٹی لینڈ مافیا، ڈرگ ڈیلرز و خاص کر تعلیمی ادارہ غاتے ٹی منشیات نا کاریم اٹ اتنگ نا برخلاف جاری مہم ءِ پین جوان کننگ و اودے گچین جوڑ کننگ کن سیکرٹری داخلہ نا سرکڑدہ ہی ٹی کوآڈینیشن کمیٹی اس ٹہیفنگ نا فیصلہ کننگا و وزیراعظم نا خصوصی کمکار علی نواز اعوان و ایم این اے راجہ خرم نواز کمیٹی نا راہشونی نا فرض ءِ پورو کیرہ۔ اسلام آباد پولیس نا کارکڑد ءِ پین گچین و جوان جوڑ کننگ کن آئی جی اسلام آباد آن سلاہ و سوج بٹنگ انگا۔ داوخت آ وزیراعظم پارے کہ اسلام آباد و اونا ایب و کیب اٹی نیزگار تا ڈغار تے کوزہ کننگ و اوفتیا ناجائز کوزہ کروک آتا برخلاف ہچ وڑنا رعایت کننگپک۔ وزیراعظم بنجائی دارالحکومت ءِ ماڈل سٹی اس جوڑ کننگ و اوٹی بے پرخ و امتیاز کانودنا حکمرانی ءِ المی جوڑ کننگ کن پولیس، اسلام آباد انتظامیہ و ایلو ادارہ غاتے ہروڑ سپورٹ تننگ کن یخین دہانی کرفے۔ وزیراعظم پارے کہ بنجائی دارالحکومت اٹی لینڈ مافیاءِ اسل سگپرہ۔ بدقسمتی اٹ ملک اٹی طبقاتی کانود نا رواج ءِ ہراڑے بااثر خلقت نا ڈوہ تیان چشم پوشی وخت اس کہ نیزگار غریب آتے سزا تننگک۔ اوپارے کہ تحریک انصاف نا حکومت داروایت ءِ بدلیفنگ کن پرعزم ءِ۔ وزیراعظم پارت کرے کہ نیزگار تا ڈغار تیا ناجائز کوزہ کروک و لینڈ مافیا نا برخلاف آپریشن الس و میڈیا ءِ اوار ہلسا مون آ ہِننگے۔