اسلام آباد۔ 12نومبر (اے پی پی) چین پاکستان اقتصادی راہداری (سی پیک) ڈٹ انا رداٹ گوادر اٹی 10 ملین ڈالر نا خڑچ آن جوڑ مروک آ پروجیکٹ پاک چائنہ ٹیکنیکل اینڈ ووکیشنل انسٹیٹیو ٹ گوادر آ کاریم ترندی اٹ برجاءِ۔ سی پیک سیکرٹریٹ کمامدارآتا رداٹ دا ڈٹ بلوچستان نا شار گوادر اٹی جوڑ کننگک۔ ڈٹ انا مسخت گوادر نا بے روزگار ورناتے فنی تربیت ترسا آخبت اٹی گوادر پورٹ آ روزگار فراوان کننگ ناءِ۔ کمامدارآک پاریر کہ ہندا ڈٹ اکن گوادر پورٹ اتھارٹی 18 ایکڑ ڈغار ہلکونے۔ داڈٹ انا فزیبلٹی رپورٹ جنوری 2017 ء ٹی تیار کننگا و دانا منٹ آتیا چائنہ انٹرنیشنل انجینئرنگ کمپنی آن 9 اگست 2017 ء ٹی دستخط مس وخت اس کہ دانا معاہدہ اپریل 2018 ء ٹی مس۔ داکان بیدس دا ڈٹ آ کاریم ترندی اٹ برجاءِ۔ داڈٹ ءِ وزارت میری ٹائم افیئرز، پلاننگ و ڈویلپمنٹ سپروائزر کننگ ءِ و داڑآ غٹ خڑچ آک چینی حکومت نا گرانٹ آن مننگ ءُ۔ اوپاریر کہ گوادر پورٹ سٹی ٹی ہموجاگہ نا رہینگوک آ الس بنداوی شریداری ءُ، و بندرگاہ نا آپریشنل مننگ و دانا بست وبند و صنعتی و واپاری سرجزآتے ٹی اوار مننگ دا اہم شونداری ڈٹ انا بنداوی مسخت آک ءُ ۔
