اسلام آباد۔ 09 نومبر (اے پی پی) وزیراعظم عمران خان پارینے کہ پاکستانی قوم انا مون آ ہچ ءُ گڑاس ناممکن اف، ننے اللہ تعالیٰ ہروڑنا وسیلہ غاتیان مالامال ملک اس تس، نن لمہ وطن ءِ ہمو ملک جوڑ کینہ ہرانا تغ ءِ شاعر مشرق علامہ اقبال خناسس، و اسہ عظیم ءُ قوم اس جوڑ مرینہ۔ اوداہیت ءِ جمعہ نادے یوم اقبال نا وخت آ تینا ویڈیو کلہو اٹی پارے۔ وزیراعظم پارے کہ 9 نومبر علامہ اقبال نا سال دے انا دے ءِ و داوخت آ او علامہ اقبال نا فلسفہ نا اسہ پلو اسے آ ہیت کننگ نا خواہندار ءِ انتئے کہ اقبال نا فلسفہ تو اسہ سمندر اسے، اونا کیہی پلو آتیا ہیت مننگ کیک۔ وزیراعظم پارے کہ فلسفہ اقبال نا ہرا پہلو آ او ہیت کننگ خواہک او اقبال نا شاہین ءِ۔ اوپارے کہ اقبال ہرادے شاہین اٹ تشبیہ تس او اسہ ہندن ءُ انسان اس ئس ہراتینا جندی انا ء و خلیس آن ذہنی وڑاٹ آجو مسوسس و ولدا او ایلو انسان تیان بڑزتر مرسا ہنا ۔ اقبال نا شاہین ہمو بندغ آک ئسر ہرافتے پیغمبر اسلام حضرت ﷺ آجو کریسس و ولدا او عظیم ءُ انسان جوڑ مسر، اوفتا مون آ بھلا بھلا واک آک چٹار و اوفک اسہ ریاست اس جوڑ کریر و اسہ ہندن ءُ تہذیب اسے نا بنداو ءِ تخار ہرا دنیا غا حاوی مس۔ وزیراعظم عمران خان پارے کہ اقبال نا شاہین ہندن ءُ انسان ئسر ہرافتا سوچ بڑزمس و اوتینا ’’ای‘‘ آن پیشن پیش تمار۔ عمران خان پارے کہ داانسانک تینا ذات انا جاگہ غا انسانیت نا سجفنگ نا بناءِ کریر۔ اوتینا خلیس نا زمزیر آتے پرغار و او بے خوف مسر، او انسان عقل نا غلامی آن ہم آزاد مسر، عقل نا غلامی انت اسے؟ دنیا نا غٹ آن بھلا مش ماؤنٹ ایورسٹ ءِ ہرا اولیکو انسان سرکریسس ، اونا پن ایڈمنڈ ہیلری ئس۔ داکان مست اخس کہ بندغ دامش ءِ سرکننگ نا کوشست کریر او یا تو کسکر یا او بے سہب مسر۔ وزیراعظم پارے کہ ایڈمنڈ ہیلری اگہ عقل نا غلام اس مسکہ تو او ماؤنٹ ایورسٹ ءِ وخت اس ہم سرکننگ کتوکہ انتئے کہ عقل ہندا پاہک کہ اگہ کسس دادے سرکننگ کتو تو او ہم کننگ کپک ولے ہراتم انسان اٹی عشق و جنون بریک تو او ولدا ناممکن ءِ ممکن جوڑ کیک و ولدا ہراتم او اسہ مزل اس دوئی کیک تو اوکان پد او سلپک۔ داوخت آ اوعلامہ اقبال نا شعر نا مصرعہ اس ’’ستاروں سے آگے جہاں اور بھی ہیں‘‘ نا حوالہ ءِ ترسا پارے کہ انسان اسہ مزل اس دوئی کننگ آن پد ایلو مزل آ کاہک و دا اشرف المخلوقات مریک یعنی اللہ نا عظیم مخلوق۔ وزیراعظم پارے کہ انسان ءِ اللہ تعالیٰ بھاز زیات طاقت تسنے ، او اخس دا طاقت ءِ آزمائفک او و پین بڑزاکاہک۔ وزیراعظم نبی کریم ﷺ و اونا صحابہؓ نا زند انا حوالہ ءِ ترسا پارے کہ نبی ﷺ نا صحابہ کرامؓ و داوخت چنکو کچ اسے ٹی مسلمانک بے مٹ کارنامہ انجام تسر و ہراکاریم ءِ اوفک انجام تسر انسانی تاریخ اٹی پین کس اس انجام تتنے۔ وزیراعظم پاکستانی قوم ءِ مخاطب کرسا یوم اقبال آ کلہو اس تس کہ ننا مون آ ہچ ءُ گڑاس ناممکن اف، ننے اللہ ہندن ءُ ملک اس تسنے ہراٹی ہرگڑاارے۔ ہندا نا علامہ اقبال تغ ءِ خناسس۔ ننا سیاسی راہشون قائد اعظم ئس، علامہ اقبال و قائد اعظم عظیم ءُ بندغ ئسر ، داعظیم راہشون تیان اسٹ اس ملک انا سجفے و ایلو ملک ءِ جوڑ کرے۔ وزیراعظم داہیت آ زور شاغا کہ ننے دادے ہمو ملک جوڑ کروئی ءِ ہرادادے جوڑ مروئی ئسک، نن بایدے دا دے دماغ اٹ تخن کہ ہچ ءُ گڑاس ناممکن اف۔ داقوم عظیم جوڑ مننگ کیک و نن انشاء اللہ عظیم ءُ قوم اس جوڑ مرینہ۔
