اسلام آباد ۔ 09 نومبر (اے پی پی) پاکستان اٹی تعینات امریکی سفیر پال ڈبلیو جونز ہائر ایجوکیشن کمیشن نا چیئرمین ڈاکٹر طارق بنوری تون اوڑدہی کرے، امریکی سفیر ءِ بخیر اٹ پارسا ڈاکٹر بنوری امریکی سفارت خانہ نا مثبت کڑد انا ستاءِ کرسا پارے کہ پاکستان و امریکہ نا نیام اٹ بڑزکو تعلیمی پڑ اٹی تعلقداری نا خصوصی تاریخ اسے۔ اوپارے کہ امریکی کمکاری آن انسٹی ٹیوٹ آف بزنس ایڈمنسٹریشن، کراچی ، لاہور، یونیورسٹی آف مینجمنٹ سائنسز ، لاہور، و یونیورسٹی آ ف ایگریکلچر ، فیصل آباد کون آ تعلیمی ادارہ جوڑ کننگ و سوگوکننگ ممکن مس۔ امریکی سفیر پارے کہ امریکہ دوست ملک آتا چندی بشخ جاٹ خاص کر تعلیم نا بشخ اٹی کمکاری نا چرجوئی ءِ برجاتخک انتئے کہ تعلیم ہی نا سوب مریس وختی شونداری ممکن مریک۔ ڈاکٹر بنوری یو ایس ایڈ سنٹر آف ایڈوانسڈ سٹڈیز پروگرام نا ستاءِ کرسا پارے کہ دا سنٹر آتا سوگوی کن ہرممکن کوشست کننگ انگ ءِ۔ اوپارے کہ یو ایس فل برائٹ اسکالر شپ پروگرام مچ آ دنیا ٹی تینا وڑنا گچین ءُ ڈٹ اسے ہراڑان پاکستانی طالب علم و اسکالر آک فائدہ ہرفنگ ءُ۔ اوپارے کہ یو ایس و پاکستان نا نیام اٹ پٹ وپول نا بشخ اٹی کمکاری بے کچ اہمیت تخک دُن کہ یو ایس پاکستان سائنس اینڈ ٹیکنالوجی پروگرام نا فیز7 پورو مننگ ءِ وخت اس کہ دا پروگرام نا فیز 8 انا زوت ہی بناءِ کننگک۔ امریکی سفیر پارے کہ پاکستانی طالب علم آتے انڈر گریجویٹ پروگرام تے ٹی تعلیم حاصل کننگ کن ہم امریکی جامعہ غاتے ٹی داخلہ بایدے ہلوئی مرے۔ اواومیت ظاہر کرے کہ ہڑتوم آ ملک آتا نیام اٹ اسیجا ریسرچ پروگرام تا کاریم کننگ آن ہڑتوم آ کنڈآتا تعلقداریک پین سوگو مریرہ۔
