اسلام آباد۔ 09 نومبر (اے پی پی) وزیراعظم عمران خان پارینے کہ ملک آن پولیو نا چٹفنگ ننا قومی مسخت ءِ، پاکستان ءِ پولیو آن پاک ملک اس جوڑ کننگ کن غٹ کوشست آتے کاریم اٹ اتنگے، بنجائی حکومت پولیو نا چٹفنگ نا مہم ءِ سرسہب جوڑ کننگ کن ہر وڑ کمک فراوان کیک۔ او جمعہ نادے داڑے انسداد پولیو نا بابت قومی ٹاسک فورس انا دیوان نا کماشی ءِ کریکہ۔ دیوان اٹی وزیر جان جوڑی عامر محمود کیانی، گورنر خیبر پختونخواشاہ فرمان، وزیراعلیٰ پنجاب سردار عثمان بزدار، وزیراعلیٰ سندھ سید مراد علی شاہ، وزیراعلیٰ گلگت بلتستان حافظ حفیظ الرحمان ، لیفٹیننٹ جنرل محمد افضل، صوبہ غاتا چیف سیکرٹریز و انسداد پولیو نا مہم اٹی شریدار ادارہ و تعلقدار سینئر کمامدارآک ساڑی ئسر۔ دیوان اٹی ملک آن پولیو نا پورو چٹفنگ نا بابت کروک آ کوشست آتا ساڑی آ حالیت آتا بارواٹ احوال تننگا۔ وزیراعلاک دیوان ءِ صوبائی حکومت آتا کنڈآن کروک آ کوشست آتا بارواٹ معلومدار کریر۔ وزیراعظم دا ناجوڑی نا ہلوک آ اثرآتابارواٹ الس اٹی آگاہی ودی کننگ کن پبی کوشست آتا گرج آ زور شاغا۔
