اسلام آباد۔ 09 نومبر (اے پی پی) پاک بحریہ نا سروک ایڈمرل ظفر محمود عباسی نا روس انا دورہ ٹی بالٹک فلیٹ نا کمانڈر تون اوڑدہی کرے۔ ترجمان پاک بحریہ نا رداٹ بالٹک فلیٹ ہیڈکوارٹرز آ بننگ آ بالٹک فلیٹ نا کمانڈر پاک بحریہ نا سروک ءِ جم وجوش اٹ بخیر کرے ۔ بالٹک فلیٹ ہیڈ کوارٹر آبننگ آ روایتی گارڈنیول چیف ءِ جم وجوش وڑاٹ شرفی سلامی اس پیش کرے۔ ترجمان پاک بحریہ نا رداٹ اوڑدہی ٹی تین پہ تینی است خواہی نا چندی معاملہ بشمول میری ٹائم سیکورٹی ، بحری قزاقی نا بیخ کنی نا آپریشن آتا لائخی تے ٹی ودکی آ خیال آتا درشانی ءِ کننگا۔ بالٹک فلیٹ نا کمانڈر نیول چیف ءِ فلیٹ نا آپریشن آتا بابت احوال تس۔ پاک بحریہ نا سروک روس انا بحری جہاز’’بوئیکی‘‘ نا ہم دورہ ءِ کرے۔ جہاز انا کمانڈنگ آفیسر نیول چیف ءِ احوال تس ، نیول چیف جہاز انا عملہ تون ہیت وگپ کرے و اونا کسبی معاملہ غاتا ستاءِ کرے۔ نیول چیف وارمیموریل کمپلیس اٹی پھل آتا چادر اس ہم شاغا۔ پاک بحریہ نا سروک نا دا دورہ ہڑتوم آ ملک آتا بحری فوج آتا نیام اٹ تین پہ تینی تعلقداری تے ٹی پین ودکی و سوگوی نا سوب مریک۔
