اسلام آباد۔ 09نومبر (اے پی پی) وزیر مملکت پارلیمانی امور علی محمد خان پارینے کہ سمندر پار پاکستانی تے کن قومی پالیسی اس جوڑ کننگ انگ ءِ، الس ننے آن 70 سال انا ویل آتا ایسری کن اومیت اس کرینے، نن اوفتا اومیت آتے پورو کینہ۔ جمعہ نا دے ایوان بالا ٹی وقفہ سوج آتے ٹی سینیٹر چوہدری تنویر خان نا سوج انا ورندی ٹی وزیر مملکت پارلیمانی امور علی محمد خان پارے کہ سمندر پار پاکستانی تے کن نیشنل امیگریشن و شرحالی نا پالیسی اس جوڑ کننگ نا مرحلہ ٹی ءِ ، دانا مسخت پیشن نا ملک روزگار نا فراوانی و پیشن نا ملک اٹی رہینگوک آ پاکستانی تے و اوفتا خاہوت آتا شرحالی و پاکستان آ پدی بروک آ مہاجر آتے راج اٹی ضم کننگ ناءِ۔ سینیٹر میر کبیر نا سوج انا ورندی ٹی وزیر مملکت مواصلات مراد سعید پارے کہ سعودی عرب اٹی خلقت ءِ اقامہ نا تجدید تون اوار ایلو ویل آتا مون تروک ءِ، گدرینگوک آ سال اٹی 90ہزار پاکستانی تا سرجم آتے پیش کریسن، نن دا ویل آتا ایسری کن پاکستانی سفارت خانہ غاتے ٹی کمیونٹی ویلفیئر اتاشی تے پارت جاری کرینن۔ سینیٹر جہانزیب جمالدینی نا ضمنی سوج انا ورندی ٹی وزیر مواصلات پارے کہ پاکستان اٹی 70 سال آن ہراویل آک اریر، الس اوفتا ایسری کن ننے آ اومیت کرینے، نن انشاء اللہ الس نا اومیت آتیا پورو سلنہ، نن ویل آتا ایسری نا کنڈآ ہِننگ اُن، اوورسیز پاکستانی تا ویل آتے ہم ایسر کننگ انگ ءِ، سینیٹر میاں عتیق شیخ انا سوج آ وزیر مواصلات مراد سعید پارے کہ سمندر پار پاکستانی تے کن قومی پالیسی اس جوڑ کننگ اُن، اوفتے کن وارخواہی و آسانی ودی کینہ، 100 دے ٹی دا بابت گام گیج کینہ، سمندر پار پاکستانی تے کن پیکج اس ہتنگ اُن۔ سینیٹر طلحہ محمود نا سوج آ وزیر مواصلات مراد سعید پارے کہ پیشن نا ملک آن ہلوک آ گڑا، مشینری میٹریل آتا جاست وپاست ءِ کننگ انگ ءِ کہ اوفتا ایوارڈز آتے امر تننگا، دا معاملہ غا اگہ کرپشن اس مس تو اونا جامع رپورٹ ءِ ایوان اٹی پیش کینہ۔
