وزیراعظم عمران خان اقبال ؒ نا سوچ انا رداٹ پوسکن ءُ پاکستان اس جوڑ کننگ کن پرعزم ءِ، وزیراعلیٰ پنجاب سردار عثمان بزدار

لاہور۔ 09 نومبر (اے پی پی) وزیراعلیٰ پنجاب سردار عثمان بزدار نا شاعر مشرق علامہ محمد اقبال ؒ نا مزار آ حاضری تس ، او اقبال ؒ نا مزار آ پھل آتا چادر اس شاغا و فاتحہ خوانی کرے ۔ اوکان پد وزیراعلیٰ پنجاب عظیم مفکر و شاعر مشرق علامہ محمد اقبالؒ ءِ خراج عقیدت پیش کرے و مہمان تا کتاب اٹی تینا تاثر آتے نوشتہ کرے، داوخت آ وزیراعلیٰ پنجاب سردار عثمان بزدار پارے کہ علامہ اقبال ؒ تینا شاعری نا کمک اٹ امن و ایلمی نا کلہو ءِ تس و نن علامہ اقبالؒ نا سوچ آ عمل کرسا سرسہبی دوئی کننگ کینہ، علامہ اقبال ؒ نا کلہو اومیت و خودداری نا ءِ، پوسکن آ پاکستان نا بنداو ہم ہندا اصول آتیا تخنگ انگ ءِ، وزیراعظم عمران خان اقبالؒ نا سوچ آتا رداٹ پوسکن ءُ پاکستان اس جوڑکیک، اوپارے کہ علامہ اقبال ؒ مسلمان تا سیوت و یکجہتی نا داعی ئس، علامہ اقبال ؒ علاقائی دنگ و قیود آن ماورا مرسا مچ آ انسانیت ءِ تینا کلہو نا مخاطب جوڑ کرے، علامہ محمد اقبال ؒ راج ءِ مثبت رخ اس سجفنگ نا فکر و ورناتے انقلابی کلہو اس تس، اقبال ؒ اسہ عظیم ءُ دانشور اس ئس ہرانا تعلیمات و نظریہ غاک اینو ہم ننا راہشونی ءِ کیرہ و اینو عظیم سوچ تخوک آ مفکر علامہ ڈاکٹر محمد اقبال ؒ نا تعلیم و فلسفہ غاتے یات کننگ نا دے ءِ ۔ اوپارے کہ اینو ننے عظیم شاعر علامہ اقبال ؒ تون عہد کروئی ءِ کہ اونا ابدی کلہو آ عمل کرسا ہی پاکستان نا اصل مزل نا دوئی ءِ المی جوڑ کینہ۔