حکومت اقبال ڈے آ لس تعطیل نا پڑو ءِ کے، چیئرمین سینیٹر صادق سنجرانی نا رولنگ
اقبال نا سوچ و خیال و تعلیم آتے لس کننگ کن گام گیج کننگے، راجہ ظفر الحق
اسلام آباد۔ 09نومبر (اے پی پی) چیئرمین سینیٹر صادق سنجرانی ورلنگ تسنے کہ حکومت اقبال ڈے انا لس تعطیل نا پڑو ءِ کے۔ جمعہ نا دے ایوان بالا نا دیوان اٹی چیئرمین سینیٹ اقبال دے انا مناسبت اٹ گپ و تران کرسا علامہ اقبال ؒ نا 141 می یوم پیدائش آ پاکستان و غٹ امت مسلمہ ءِ مبارکبادی تس و پارے کہ علامہ اقبال ؒ نا تعلیم و سوچ و پام آن راہشونی دوئی کننگ نا گرج ءِ۔ اوپارے کہ علامہ اقبال ؒ نا فکر و شاعری آن نئے بیرہ پاکستان بلکن مچ آ امت مسلمہ راہشونی دوئی کرے۔ او ورناتیا زور شاغا کہ او علامہ اقبال ؒ نا تعلیم و شاعری آن فائدہ ہرفر، اونا تعلیم و کلہو شونداری نا ذریعہ جوڑ مننگ کیک۔ شرہ ٹی ایوان بالااٹی جتا سیاسی جماعت آتیان تعلق تخوک آ باسک آک پاریر کہ علامہ اقبال ؒ نا کلام ، فکر و فلسفہ غان نئے بیرہ پاکستان بلکن دنیا نا چندی ملک آک راہشون دوئی کریر۔ اقبال نا فکر و تعلیم تے لس کننگ کن گام گیج کننگے۔ قائد حزب اختلاف سینیٹر راجہ ظفر الحق پارے کہ اقبال نئے بیرہ محسن پاکستان ءِ بلکن او اولیکو وار جوان وڑاٹ پاکستان نا جوڑ کننگ نا ہیت ءِ کرے، برصغیر نا مسلم ہندو پھسات آتا ایسری ءِ او تجویز کرے۔ ہرافتیااونازند اٹ عمل مننگ کتو، نن بایدے اونا سوچ آن فائدہ ہرفن، اقبال نا کلامک قرآن نا تعلیم تیا مبنی ءُ، مصر ، ترکی ، ایران تون اوار کیہی ملک آک اونا کلام تیان فائدہ ہرفیر و اوفتیا پٹ وپول کننگ انگ ءِ۔ قائد ایوان سینیٹر شبلی فراز پارے کہ ای ہم تائید کیوہ کہ اقبال ؒ ننکن ہی آخا ہر جاگہ کن اہمیت و نمان ہنداس تخک۔ ننا حکومت ادب، دودوربیدگ، آرٹ انا احیاء آ پبی چکار کیک، پاکستان اقبالؒ غان چاہنگک ، قومک دُن انگا ہی دانشور آتیان چاہنگرہ ، اینو نادے ءِ قومی ءُ دے اس سرپند کرسا اونا سوچ و کڑد ءِ بایدے تالان کروئی مرے۔ اینو ہم ہمووڑ حالیت آتا مون تروک ءِ ہراکہ اونا شاعری نا دور اٹی ئس۔ چیئرمین سینیٹ رولنگ تس کہ حکومت 9 نومبر آ لس تعطیل نا پڑو ءِ کے۔
