اسلام آباد۔ 08 نومبر (اے پی پی) وزیر مملکت مواصلات مراد سعید خان پارینے کہ بھارت خراب انگا نظر اٹ پاکستان نا کنڈا ہرا تو پبی ورندی تننگک، حکومت پاننگ ءِ کہ دُز آتے جیل آ گدریفنگک۔ اپوزیشن معاشی حالیت آتیا شرہ کن سلاہ سوج ترسا نرا، سنگت ملک آک پاکستان نا کمک ءِ کننگ ءُ۔ پنچ شنبے نادے پارلیمنٹ ہاؤس نا پیشن میڈیا تون ہیت وگپ کرسا وزیر مملکت پارے کہ وزیراعظم عمران خان نا چین نا دورہ بے کچ سرسہب مس، پاکستان نا سنگت ملک آک اوار سلوک ءُ و کمک کن مون آ بننگ ءُ۔ مراد سعید پارے کہ بھارت وار وار سیمی خلاف ورزی کننگ ءِ وخت اس کہ بارڈر نا خڑک آ شاری تے شہید کننگ ءِ۔ دابابت پاکستان اقوام متحدہ ٹی تینا برانز ءِ ریکارڈ کرفک۔ اوپارے کہ بھارت خراب انگا نظر اٹ پاکستان نا کنڈآ ہُننگ کپک ۔ اگہ بیدادی کرے تو پبی ورندی تننگک۔ اسہ سوج اسے نا ورندی ٹی وزیر مملکت پارے کہ وزراء پارلیمنٹ باسک آک پاکستان نا سرکاری ہسپتال آتے ٹی درمان کرفرہ تو نئے بیرہ ہسپتال آتا حالیت اٹی گچینی بریک بلکن درمان کن آسراتی تیٹی ہم گچینی بریک۔ وزیر مملکت پارے کہ حکومت پاہک کہ دُز آتے ہلیپنہ، اوفتے جیل آ دینہ تو شور شرابہ بناکیک، حکومت نا احتساب نا عمل برجاسلک۔ اسہ کرپٹ اسے ہم ہلیپنہ۔ اوپارے کہ اپوزیشن ملک انا ساڑی آ معاشی حالیت آ سلاہ و سوج کن پارے ہراتم نن ایجنڈا ءِ پد بٹسا شرہ نا بناءِ کرین تو اپوزیشن نرنگ نا کسر ءِ اختیار کرے۔ ہراتم رابطہ کرین تو ورندی ملا کمیٹی آ گدریفنگے ، ہموڑے سلاہ و سوج ایتنہ۔
