اسلام آباد۔ 08 نومبر (اے پی پی) بنجائی وزیر ریلوے شیخ رشید احمد پارینے کہ پاکستان ریلوے چین نا کمک اٹ تینا ساڑی آ نیٹ ورک ءِ اپ گریڈ و سروس ءِ گچین جوڑ کرسا انقلاب اس اتیک۔ چائنہ ریڈیو انٹرنیشنل ءِ انٹرویو ٹی اوپارے کہ پاکستان و چین نا نیام اٹ کڑمب و دوستانہ تعلقداری ءِ، ہڑتوم آ ملک آتا نیام اٹ سنگتی ہمالیہ آن بھلن ءِ و چین ننا ویل آتا ادراک تخک۔ اوپارے کہ ہڑتوم آ ملک آتا نیام اٹ سنگتی ہر آزمائش آ پورو سلیسونے و ہر گدرینگوک آ دے اتون سنگتی نا رشتہ پین زیات مسنے۔ ریلوے سیکٹر نا شونداری چائنا پاکستان اکنامک کوریڈور (سی پیک) نا سرسہبی ءِ المی جوڑ کیک۔ بنجائی وزیر دا عزم انا اعادہ ءِ کرے کہ سی پیک آن ڈیہہ نا تقدیر بدلینگک و پاکستان و چین نا نیام اٹ تعلقداریک پین زیات مریرہ۔ بنجائی وزیر پارے کہ گوادر نا بندرگاہ سی پیک فریم ورک انا اہم جزو اسے ہرا چین نا کمک اٹ جوڑ کننگ انگ ءِ، ہراڑے 200 بحری جہاز سلنگ نا گنجائش ساڑی ءِ، ہراتم دا بندرگاہ پورو مریک تو دنیا نا ہشت می بھلا بندرگاہ مریک۔ اوپارے کہ وزیراعظم پاکستان نا چین نا دورہ نا دوررس نتیجہ دوئی مریک و داڑآن ہڑتوم آ ملک آتا نیام اٹ سنگتی نا رشتہ پین زیات مریک۔ اوپارے کہ دادورہ آن ہڑتوم آ ملک آتا نیام اٹ تعلقداری تا بابت مروک آ منفی پروپیگنڈا ہم چٹک۔ اسہ سوج اسے نا ورندی ٹی اوپارے کہ اولیکو چائنا انٹرنیشنل ایکسپورٹ ایکسپو ٹی پاکستان اسہ اعزازی مہمان اسے نا وڑاٹ بشخ ہلکونے و دانا بنائی سیشن آن وزیراعظم اہم ءُ تران اس کرے۔ اواومیت ظاہر کرے کہ داکان پد چین اتون واپار اٹی پوریاگر تے پین آسراتی ملک۔
