کوئٹہ۔ 08 نومبر (اے پی پی) وزیراعلیٰ بلوچستان جام کمال خان پارینے کہ صوبہ ٹی گوازی و ایلو مثبت سرجزآتا اڈتننگ آن بلوچستان نا مثبت تاثر مون آ بننگ ءِ و جہانی کہول آ اسہ پرامن بلوچستان اسے نا کلہو ہِننگ ءِ۔ کوئٹہ ٹی جہانی اسکواش لیگ انا سرسہب اڈتننگ اسہ اہم ءُ پیش رفت اسے ہراڑان پاکستان اٹی جتا گوازی تا اڈتننگ و جہانی گوازی گر تا بننگ نا درگہ غاک ملنگانو، داخیال آتا درشانی ءِ او بلوچستان جہانی اسکواش لیگ انا انعام آتا بشخ وپانٹ نا دود آن تران کرسا کرے۔ وزیراعلیٰ پارے کہ سیکورٹی ادارہ غاتا کوشست و قربانی تتون اوار اوار بلوچستان نا الس نا کمک و دہشت گردی نا برخلاف اوفتا پکا عزم انا سوب اینو بلوچستان اسہ پرامن ءُ صوبہ اس جوڑ مسنے ہراڑے جہانی گوازی و ایشین پارلیمنٹری اسمبلی نا اڈتننگ کون آ اہم سرجزآک مننگ ءُ ، وزیراعلیٰ پارے کہ صوبہ نا شونداری گرج آک تینا جاگہ غاٹی ءُ داڑتون اوار اوار گوازی تا اڈتننگ ہم اہم ءِ، نن گوازی تا کمک اٹ تینا یوتھ ءِ مون آ ہِننگ نا وارخواہی فراوان کیک و ایلو ملک آتیامبار گوازی تا سرپرستی ءِ کننگک۔
