اسلام آباد ۔ 7 نومبر (اے پی پی) مزن وزیر عمران خان ءَ گوشت کہ پاکستان تحریک ءِ انصاف ءِ حکومت ءَ وتی منشور ءَ را پکوئیں رنگ دیگ ءِ ھاترا جزمیگ اِنت، ایمنی ءِ برجائی ءُُ کانود ءِ سروکی حکومت ءِ اولی گپ ءُُ کار اِنت، حکومت وتی وزیر ءِ کرد ءِ چار ءُُ تپاس ءِ ھاترا بندات ءَ کنت۔ آئی ءَ اے گپ صوابی، مردان، چارسدہ، نوشہرہ ءُُ پشاور ءَ گوں سیادی داروکیں اسمبلی ءِ باسک آں گوں تران کنان ءَ گوشت ، آئی ءَ چار شمبے ءَ مزن وزیر کارگس ءَ آئی ءَ گوں گند ءُُ نند کت۔ سپیکر قومی اسمبلی اسد قیصر، وزیرِ دیمپانی پرویز خٹک، وزیر مملکت علی محمد خان ءُُ ھاسیں کمکار نعیم الحق ھم گند ءُُ نند ءَ ساڑی ات۔ اسمبلی ءِ باسک آں مزن وزیر ءَ را وتی وتی دمگ ءِ جیڈھ آنی مزن وزیر ءَ سرپد کت۔ خیبر پختوانخوا ءِ ھواریں جاور ھال ءُُ دیمروئی منصوبگ آنی ھوالگ ءَ ھم گپ ءُُ تران بوت۔ آئی ءَ گوشت کہ حکومت ءَ 50 لکھ لوگ ءِ منصوبگ ءِ وسیلگ ءَ مردم آناں گس رسیت ءُُ معیشت گام جنان بیت ءُُ ورنا آناں روزگار ءِ موہ رسیت۔ مزن وزیر ءَ گوشت کہ بازیں دمگ آں گریب ءُُ بزگر آناں ادارُکی شیلٹر ءُُ دو وھد ءِ وردن ءُُ وراک پُجارینگ ءِ سر ءَ کار جاڑی اِنت۔ ھما اسمبلی ءِ باسک آں کہ وتی وتی دمگ آں بے نظیر انکم سپورٹ پروگرام ءِ نیمگ ءَ چہ سروے نہ کتگ آ اے رد ءَ حکومت ءَ سرپد بکن انت تانکہ زوت آ دمگ آں گریب ءُُ بزگر آنی سر ءَ سروے کنگ بہ بیت۔ مزن وزیر ءَ گوشت کہ پی ٹی آئی حکومت وتی منشور ءَ را سرجم کنگ ءِ واستہ جزمیگ اِنت، حکومتی وزیر وتی کرد ءِ بابت ءَ جوابدہ اَنت، حکومتی وزیر آنی کرد ءَ را یک چک ءَ چار ءُُ تپاسی گرگ بیت۔ آئی ءَ گوشت کہ حکومتی وزیر آنی کر د ءَ چار ءُُ تپاسی گرگ ءِ روایت اے ملک ءَ نیست بلے پی ٹی آئی حکومت ایشی ءِ بنیات ءَ ایرر کنت، کیساس دُرستانی سر ءَ کنگ بیت حکومت الس ءِ گوما کتگیں سوگند آنی پیلو کنگ ءَ جزمیگ اِنت۔
