اسلام آباد۔ 07 نومبر (اے پی پی) بنجائی وزیر اطلاعات و نشریات و قومی میرات چوہدری فواد حسین پارینے کہ پاکستان اٹی ادائیگی تا توازن نا بنائی ویل چٹانے، شہباز شریف ءِ پبلک اکاؤنٹس کمیٹی نا سروک جوڑ کننگ مسخرہ اس مریک ، کس اسے نا برخلاف کریک ڈاؤن کپننگ انگ ءِ، ہراخلقت توڑپھوڑ کریر، پراپرٹی ءِ لٹار و گاڈی تے نسخان تسر اوفتے ہلنگ انگ ءِ۔ چارشنبے نادے پارلیمنٹ ہاؤس نا پیشن میڈیا نا نمائندہ غاتون ہیت وگپ کرسا بنجائی وزیر پارے کہ جہانی مالیاتی فنڈ (آئی ایم ایف) تون سوگو لانگ ٹرم گام گیج آتا کنڈآ ہِننگ اُن، ملک اٹی داسہ سوگوی ءِ، پاکستان اٹی ادائیگی تا توازن نا بنائی ویل چٹانے۔ چوہدری فواد حسین پارے کہ پبلک اکاؤنٹس کمیٹی نا ٹہیفنگ کن اپوزیشن تینا ضد ءِ ہلے، شہباز شریف ءِ پبلک اکاؤنٹس کمیٹی نا سروک امر جوڑ کننگ مریک او نواز شریف نا دور حکومت نا آڈٹ اعتراض آتے رکھ تننگ کیک، اودے چیئرمین خلنگ مسخرہ اسے ، دابابت زوت اپوزیشن تون اواری اٹ فیصلہ اس کننگک۔ بنجائی وزیر پارے کہ آصف زرداری ءِ ہرہیت غلط وخت آ یات بریک ، زرداری صاحب انتس کہ کے پنی مننگ کپک، بینک آتیان ڈیٹا دُزی مننگ نامعاملہ غا غٹ آن گچین ءُ ورندی اس پیپلزپارٹی و مسلم لیگ (ن) اٹی تولوک چاہندار آک تننگ کیرہ۔ اوبینک آتے ٹی فراڈ نا بابت پارے کہ مچ آ فراڈ نا تعلق ساڑی آ اپوزیشن نا دوراقتدار اٹی ءِ ، اوفتیان بایدے ہریفنگے داپیسہ غاتے ٹھکانہ خلنگ کن تینٹ بینک آتے کاریم اٹ ایسورہ ، داسہ اوفتا معاملہ غاک مون آ بننگ ءُ۔
