پشاور۔ 07نومبر (اے پی پی) انسداد پولیو نا بابت خیبر پختونخوا نا صوبائی ٹاسک فورس انا اہم دیوان اس چارشنبے نادے پشاور اٹی اڈ ہلک، دیوان نا کماشی ءِ انسداد پولیو کن وزیراعظم نا فوکل پرسن بابر بن عطاء و چیف سیکرٹری خیبر پختونخوا نوید کامران بلوچ کریر۔ دیوان اٹی وزیر جان جوڑی خیبر پختونخوا ہشام انعام اللہ خان، پشاور آن صوبائی اسمبلی نا باسک آک فضل الٰہی ، کامران بنگش و غٹ ضلع غاتا کمشنر ز و ڈپٹی کمشنر آک ساڑی ئسر۔ دیوان آن تران کرسا بابر بن عطاء پارے کہ وزیراعظم عمران خان نا وژن نا رداٹ پولیو آن پاک جان جوڑ پاکستان کن غٹ وسیلہ غاتے کاریم اٹ اتنگ انگ ءِ ، اوپارے کہ پولیو نا چٹفنگ کن بروک آ 6تُو بے کچ اہمیت تخرہ۔ اوپارے کہ پشاور اٹی انسداد پولیو کن پولیو وائرس آن زہمی علاقہ غاتا گچین مروک اسمبلی نا باسک آتا کوشست آک اہم پیش رفت ءُ و بروک آ انسداد پولیو مہم اٹی پشاور آن گچین مروک السی نمائندہ فضل الٰہی و کامران بنگش نا کمک اٹ داحلقہ غاتیا خصوصی چکار کننگک۔ دیوان آن تران کرسا چیف سیکرٹری پارے کہ چناتے پولیو نا سوب معذوری آن بچفنگ قومی مشن ءِ و انسداد پولیو نا موثر مہم و ہدف آتا دوئی کننگ کن انتظامیہ کڑد ادا کننگ ءِ۔ اوپارے کہ خیبر پختونخوا ٹی ضم مروک آ قبائلی ضلع غاتے ٹی محکمہ جان جوڑی خیبر پختونخوا نا چاروکی ٹی انسداد پولیو کن غٹ وسیلہ غاتے کاریم اٹ اتنگک۔ دا چرجوئی ٹی انسداد پولیو نا مربوط کوشست آتے کن مسکوہی فاٹا نا ایمر جنسی آپریشن سینٹر ءِ خیبر پختونخوا ٹی ضم کننگ نا سلاہ و سوج آ سجفنگ انگ ءِ۔
