اسلام آباد۔ 6 نومبر (اے پی پی) امریکہ ءُُ پاکستان ءِ کلانہ ایں کارندہ آں سئے شمبے ءَ دو نیمگی یکوئی آنی توامیں بھر آنی سر ءَ چار ءُُ تپاسی گپت ءُُ دونیمگی یکوئی آنی گیش ودینگ ءُُ مھکم کنگ ءِ ضلورت ءِ سر ءَ زور پر دات۔ وزارت ءِ درئی کار ءِ نیمگ ءَ اداد جاڑی بوتگیں بیان ءِ رد ءَ امریکہ ءِ پرنسپل ڈپٹی اسسٹنٹ سیکرٹری برائے بیوروآف ساؤتھ اینڈ سنٹرل ایشیاء ءِ سفیر ایلس ویلز ءَ وزیر ءِ ھزانگ اسد عمر ءَ گوں گند ءُُ نند ءَ ابید وزارت ءِ ھزانگ ءَ کلانہ ایں کارندہ آں مزن تک ءِ ڈل ءَ گوں سول ءُُ تران کت۔ مزن تک ءِ سول ءُُ تران ءِ تہ ءَ ایڈیشنل سیکرٹری (امریکاز) آفتاب کھوکھر ءَ پاکستانی ڈل ءِ سروکی کت۔ ڈل ءِ تہءَ وزارت ءِ توکی کار ءُُ وزارت ءِ دیمپانی ءِ کلانہ ایں کارندہ ھوار اتنت۔ دیوان ءَ وزیر ءِ درئی کار شاہ محمود قریشی ءُُ امریکی سیکرٹری درئی کار مائیکل رچرڈ پومپیو ءِ نیام ءَ وت مہ وتی ءُُ شرپی کار آنی سر ءَ چار ءُُ تپاسی زورگ بوت۔ ایشی ءِ تہ ءَ یکجائی نپ ءُُ سیت ءُُ دو نیمگی مول ءُُ مراد ءُُ یکوئی آنی گیش ودینگ ءِ کوشست آناں جاڑی دارگ ءِ سر ءَ تپاک کت۔
