اسلام آباد۔ 06نومبر (اے پی پی) وزیر خارجہ شاہ محمود قریشی پارینے کہ پاکستان و یورپین یونین نا نیام اٹ ہڑتوم آ کنڈآتا واپار و اقتصادی کمکاری ءِ پین ودفنگ نا گرج ءِ، پاکستان اوغانستان اٹی امن و سوگوی نا خواہندار ءِ۔ داہیتءِ او پاکستان اٹی یورپی یونین نا سفیر فرانکوئس کاٹین تون ہیت وگپ کرسا پارے ہرا سے شنبے نادے داڑے دفتر خارجہ ٹی اوڑتون اوڑدہی کرے۔ ترجمان نا رداٹ اوڑدہی ٹی تین پہ تینی است خواہی نا علاقائی و جہانی معاملہ غاتیا شرہ مس وخت اس کہ پاک۔یورپین یونین تعلقداری تے ٹی مثبت پیش رفت آ است جمی نا درشانی ءِ کننگا۔ وزیر خارجہ جان جوڑی ، تعلیم ، کشت وکشار، سیل و سوات، انسانی حق، قومی سلامتی و وڈی خوری نا توننگ تون اوار چندی بشخ آتے ٹی گچین کن حکومتی ایجنڈا ءِ تالان کرے۔ اوپارے کہ پاکستان و یورپی یونین نا نیام اٹ ہڑتوم آ کنڈآتا واپار و اقتصادی کمکاری ٹی پین ودکی و خاص کر جی ایس پی پلس اسکیم آن پبی فائدہ ہرفنگ نا گرج ءِ۔ وزیر خارجہ ہڑتوم آ کنڈآتا تعلقداری و السی رابطہ غاتے مون آدننگ اٹی یورپی ملک آتے ٹی رہینگوک پاکستانی پردیسی تا کڑد انا ستاءِ کرے و پارے کہ ساڑی آ حکومت اینخو نا سال ضمنی گچین کاری تے ٹی اولیکو وار اوورسیز پاکستانی تے الیکٹرانک ووٹنگ نا حق تسنے۔ علاقائی حالیت آتا بابت وزیر خارجہ پارے کہ پاکستان اوغانستان اٹی امن و سوگوی اتنگ کن کوشست کننگ ءِ۔ سفیر معلومدار کرسا پارے کہ یورپی یونین نا بڑزکو کمامدارآک اینخو نا سال انا آخیر اٹی جینوا ٹی اڈ تروک آ اوغانستان نا بابت کانفرنس اٹی وزیر خارجہ شاہ محمود قریشی تون اوڑدہی نا چاری ءِ۔ اقوام متحدہ نا ہیومن رائٹس کونسل و ساڑی ہی ٹی برطانوی آرپارٹیز پارلیمنٹری کشمیر پڑ انا کنڈآن مقبوضہ کشمیر اٹی انسانی حق انا سنگین خلاف ورزی تا بابت رپورٹ نا حوالہ ءِ ترسا وزیر خارجہ یورپی یونین نا سفیر آ زور شاغا کہ او حالیت آتا مون ءِ توننگ کن انسانی حق انا تینا بڑزکو معیار ءِ برقرار تخے۔
