اسلام آباد۔ 06نومبر (اے پی پی) سعودی عرب نا وزیر توانائی پاکستان اٹی آئل ریفائنری نا جوڑ کننگ نا بابت مفاہمت نا یات داشت آتیا دستخط کننگ کن زوت پاکستان نا دورہ ءِ کیک ، تینا دورہ ٹی او ایلو بھلا ڈٹ آتے ہم حتمی دروشم ایتک ہرافتے ٹی سعودی عرب است خواہی ظاہر کرینے۔ داہیت ءِ پاکستان اٹی سعودی عرب نا سفیر نواب بن سعید بن مالکی صدر مملکت ڈاکٹر عارف علوی تون اوڑدہی ٹی پارے۔ صدر مملکت سعودی سفیر نا ستاءِ کرسا سعودی عرب و پاکستان نا نیام اٹ خڑکی برادرانہ تعلقداری تا اہمیت آ زور شاغا و سعودی زرکارآتے کن است خواہی تخوک چندی بشخ آتے ہم تالان کرے۔ صدر مملکت داہیت آ زور شاغا کہ ہڑتوم آ ملک آتا نیام اٹ واپاری ڈل آتا پین ہن و برنا گرج ءِ۔ سعودی سفیر ہڑتوم آ کنڈآتا واپار ءِ وفنگ اٹی اہم کڑد ادا کننگ کیک۔ صدر مملکت ملک اٹی دہشت گردی ءِ شکست تننگ اٹی پاکستان نا سلہہ بند فوج انا کڑد انا ستاءِ کرے ہراٹی پائیدار امن و معیشت نا بحالی ممکن مس۔ داوخت آ سعودی سفیر وزیراعظم عمران خان نا سعودی عرب نا ساڑی آ دورہ غاتا بارواٹی بریفنگ تس و پار ے کہ دادورہ غاک بے کچ سرسہب مسنو ہرافتے ٹی ہڑتوم آ ملک آتا نیام اٹ کثیر الجہتی اقتصادی کمکاری پین ودانے۔ اوپاکستان اٹی امن و سوگوی نا ساڑی آ حالیت آتے خوش آئند گوندا و حکومت نا کنڈآن ملکی معیشت نا چندی بشخ آتے ٹی زرکاری کن درملکی زرکارآتے اتنگ نا چرجوئی ٹی کروک آ گام گیج آتا ستاءِ کرے۔
