جمہوری و امن پسند خلقت اُن، پوسکن آ اسلام آباد بالی پٹ نا پن ءِ بے نظیر بھٹو نا پن اٹ تخپننگ آ برانز کتون، خورشید شاہ

اسلام آباد۔ 06نومبر (اے پی پی) قومی اسمبلی ٹی پیپلزپارٹی نا سینئر راہشون خورشید شاہ پارینے کہ ایوان نا چاگڑد ءِ سہی کننگ حکومت نا حق اٹی ءِ، اوفتے دانا ادراک ءِ بایدے کروئی مرے، متکن آ اسلام آباد بالی پٹ ءِ بے نظیر بھٹو نا پن اٹ منسوب کننگاسس، داسہ اودے دُوارہ نور خان ایئر بیس نا پن ءِ تننگانے۔ سے شنبے نادے قومی اسمبلی ٹی مسکوہی قائد حزب اختلاف خورشید شاہ اعتراضی ٹک آپارے کہ بے نظیر بھٹو جمہوریت کن ماڈل اس ئسک ، اونا پن آ بے نظیر بھٹو بالی پٹ نا پن ءِ تخنگا ولے پوسکن آ اسلام آباد بالی پٹ نا پن ءِ اونا پن آ تخنگتو، نن جمہوری و امن پسند خلقت اُن، نن داڑکن برانز کتون ولے تدوک آ نن وزیراعظم نا وطن آ پدی بننگ نا خبر ءِ خوانان ہراڑا نوشتہ کننگاسس کہ او نور خان ایئر بیس آ سرمس۔ اوپارے کہ تدوک آ دے پارلیمنٹ اٹی ہرا ناخوشگوار واقعہ مس اوڑآ اسپیکر غٹ جماعت آتے بٹنگاسس۔ نن ہموڑے اسہ گھنٹہ اس انتظار کرین ولے حکومت آن تعلق تخوک آ ہچ ءُ باسک اس بتو۔ چاگڑد ءِ حکومت ءِ سہی کروئی ءِ، کرینگ نا نظام چلینگپک، داایوان نا چاگڑد ءِ سہی کننگ حکومت نا حق اٹی ءِ۔