اسلام آباد۔ 05نومبر (اے پی پی) ہاؤسنگ نا بابت ٹاسک فورس انا چیئرمین ضیغم ایم رضوی پارینے کہ مسکوہی حکومت آک الس ءِ ہنکینی آسراتی تا فراوانی نا وعدہ ءِ تو کریر ولے اوڑآ عملدرآمد کتوس۔ وزیراعظم عمران خان الس ءِ ہنکینی آسراتی فراوان کننگ نا ڈٹ اٹی بھاز است خواہی ہلنگ ءِ۔ رینٹ ایکولائزیشن نا بنداو آ ہنکینی ڈٹ جوڑ کننگک۔ یکم جنوری آن مست وزیراعظم دا ڈٹ انا بناءِ کیک ۔ دوشنبے نادے وزیر مملکت ہاؤسنگ شبیر علی قریشی، ٹاسک فورس انا باسک فردوس شمیم نقوی و صوبائی وزیر میاں محمود الرشید تون اوار پریس کانفرنس آن تران کرسا اوپارے کہ پوسکن آ پاکستان ہاؤسنگ اسکیم نا بابت بھاز انگا سوج آتے چست کننگ انگ ءِ، ٹاسک فورس انا اولیکو دیوان دوشنبے نادے مسنے ہراٹی 23 باسک آک بشخ ہلکنو۔ فردوس شمیم نقوی پارے کہ ضیغم ایم رضوی ہاؤسنگ نا بشخ اٹی مہارت تخنہ و او ورلڈ بینک اٹی ہم کاریم کرینے، داسہ دا ہندا ڈٹ آ کاریم کننگ ءُ، اونا بھلو تجربہ اس ارے، 50 لکھ اُرا ہراڑے جوڑ مریرہ امر جوڑ مریرہ دانا وضاحت کن پریس کانفرنس اس اڈتننگانے۔ اوپارے کہ 144 ضلع ءُ و 10 لکھ اُرا ہر سال جوڑ کروئی ءِ، ہنداوڑ ہر ضلع ٹی 6200 اُرا جوڑ کینہ تو نن تینا ہدف ءِ دوئی کینہ۔ اوپارے کہ ملک اٹی ہنکینی آسراتی تا بھاز کمتی ءِ ، کم آن کم اسہ کروڑ 20 لکھ اُراتا کاختی ءِ ، نن سالانہ 10 لکھ اُرا جوڑ کروئی ءِ۔ اوپارے کہ داوخت مسٹ آن مسٹ ءُ نیم لکھ اُرا ہر سال جوڑ مریک، ننے دا کچ ءِ 10 لکھ اسکان دروئی ءِ،و لوئر مڈکل و مڈل کلاس کم کٹیا کروک تپہ غاتیا خصوصی چکار کننگانے ، داچرجوئی ٹی فنانسنگ غٹ آن اہم ءُ معاملہ اسے ، نن ہاؤسنگ کن وام ایتنہ ہرا فتے اسہ بھلو مد اسے ٹی پدی تروئی مریک۔ اوپارے کہ ہراخلقت کرایہ نا اُراتے ٹی رہینگ انگ ءُ او کرایہ نا مد اٹی بھلو پیسہ اس خڑچ کیرہ، اگہ ہندا پیسہ غاتے او تینا اُراکن ایترہ تو او اُرانا مالک جوڑ مریرہ۔ اوپارے کہ ہربندغ ءِ اُرا نا نہاد نا 20 درسد تروئی مریک اوکان پد اودے 80 درسد وام ملنگ کیک، او خوار تو 20 درسد آن زیات ہم تننگ کیرہ۔
