اسلام آباد۔ 05 نومبر (اے پی پی)صدر مملکت ڈاکٹر عارف علوی پارینے کہ صوبائی و بنجائی حکومت آتے بلوچستان خاص کر صوبہ نا مر مر انگا علاقہ غاتا الس ءِ جان جوڑی نا خذمت آتا فراوانی کن ہر وڑ گام گیج بایدے ہرفوئی مرے۔ او داہیت ءِ وزیر پبلک ہیلتھ انجینئرنگ بلوچستان نور محمد دمڑ تون ہیت وگپ کرسا پارے ہرا دوشنبے نادے ایوان صدر اٹی اوڑتون اوڑدہی کرے۔ صدر داہیت آ زور شاغا کہ جسمانی و ذہنی وڑاٹ جان جوڑی انسانی وسیلہ غاک ہر قوم انا شونداری نا کلید مریرہ ۔ اوپارے کہ ریاست نا دا بنداوی زمواری مریک کہ او الس ءِ سینگ نا قابل و بریبری جان جوڑی نا خذمت آتا فراوان کے تانکہ اوفتے راج انا جوان ءُ شاری جوڑ کننگ مرے۔ صدر پارے کہ ننا چکار ناجوڑی تیان بچفنگ و احتیاط آ بایدے مرے۔ صفائی و جان جوڑی زند انا طرز ءِ مون آ دننگ کن الس اٹی شعور تالان کننگ نا مہم اس بایدے بناکروئی مرے ہرا دا رداٹ بنداوی اہمیت تخک۔ پبلک ہیلتھ انجینئرنگ نا وزیر نور محمد دمڑ صدر مملکت ءِ جاری ڈٹ و ڈول و الس ءِ جان جوڑی نا خذمت آتا فراوانی کن چست کروک آ گام گیج آتا بارواٹ معلومدار کرے۔ صدر بلوچستان نا الس ءِ المی طبی آسراتی تا فراوانی کن تینا پبی کمکاری نا یخین دہانی کرفے۔
