بیجنگ۔ 02نومبر (اے پی پی) وزیراعظم عمران خان و چین نا صدر شی جن پنگ نا اوڑدہی ٹی ہڑتوم آ راہشونک سی پیک آ پیش رفت نا جاچ ءِ ہلسا اونا سرسہبی آ است جمی نا درشانی ءِ کریر و پاکستان کن زیات آن زیات فائدہ کن اونا زوت ایسری نا عزم ءِ کرینو، ہڑتوم آ راہشونک پاک۔ چین ہڑتوم آ کنڈآتا تعلقداری تا جاچ ءِ ہلکر۔ تین پہ تینی است خواہی نا علاقائی و جہانی معاملہ غاتیا ہم خیال آتا درشانی ءِ کریر و ودوک آ سیاسی و اقتصادی بے یخینی حالیت آتا مون ءِ توننگ نا بابت اواری اٹ کاریم کننگ آ امنا کریر۔ ہڑتوم آ راہشون تا اوڑدہی جمعہ نادے داڑے پیپلز گریٹ ہال اٹی مس۔ داوخت آ وزیر اعظم عمران خان پارے کہ پاکستان تین پہ تینی فائدہ غاتارکھ، اسیجاتصور و کثیر الجہتی نظام نامون آ دننگ کن چین نا شانہ بشانہ سلوک ءِ، تخفیف نیزگاری و انسداد وڈی خوری نا بشخ آتے ٹی چین نا آزموندہ غاتیان ہیل کننگ نا خواہندار ءِ۔ وزیراعظم عمران خان پرجوش جوزہ غاتا درشانی آ چینی صدر، چین نا حکومت و الس نا منت واری ءِ ہرفے۔ وزیراعظم عمران خان اوفتے ’’اصلاحات و کشادگی‘‘ نا 40می سال دے آ مبارکبادی تس ہراٹی چین شونداری کرینے۔ اوداہیت آ زور شاغا کہ چین اتون سنگتی پاکستان نا خارجہ پالیسی نا اہم ءُ جزو اسے۔ اوداتعلقداری تے پین سوگوی تننگ کن تینا حکومت نا است خواہی نا درشانی ءِ کرے۔ وزیراعظم داہیت آ زور شاغا کہ صدر شی جن پنگ نا ’’بیلٹ اینڈ روڈ‘‘ نا وژن و اونا فلیگ شپ ڈٹ سی پیک ڈیہہ و اوڑآن پیشن غٹ اکن فائدہ مند اسیجا شونہالی نا شکل اس اختیار کیک۔ وزیراعظم پارے کہ پاکستان تین پہ تینی فائدہ ، اسیجاتصورات و کثیر الجہتی نظام نا مون آ دننگ نا رکھ اٹی چین نا شانہ بشانہ سلوک ءِ ۔ وزیراعظم شاندار مہمان نوازی آ چینی صدر نا منت واری ءِ ہرفے۔
