وزیر خارجہ شاہ محمود قریشی ، وزیر خزانہ اسد عمر ، وزیر ڈٹ بندی خسرو بختیار ، وزیر ریلوے شیخ رشید احمد، سلاہکار واپار عبدالرزاق داؤد، وزیراعلیٰ بلوچستان جام کمال وزیراعظم تون اوار ءُ
بیجنگ۔ 02 نومبر (اے پی پی) وزیراعظم عمران خان السی جمہوریہ چین نا سرکاری دورہ غا پنچ شنبے و جمعہ نا نیامی نن داڑے سرمس۔ السی جمہوریہ چین نا سرکڑدہ غاتا سلہ غا وزیراعظم عمران خان نا اگست 2018 ء ٹی وزارت عظمیٰ نا منصب ءِ سنبھالنگ آن پد چین نا دا اولیکو سرکاری دورہ ءِ ہرا ہڑتوم آ ملک آتا تین پہ تینی و روایتی گرم جوشی نا ڈیک اتون اوار اوار پاک چین سدابہار است بڈی کمکار شریداری نا درشان ءِ۔ وزیر خارجہ شاہ محمود قریشی ، وزیر خزانہ اسد عمر، وزیر ڈٹ بندی خسرو بختیار، وزیر ریلوے شیخ رشید احمد، سلاہکار واپار عبدالرزاق داؤد و وزیراعلیٰ بلوچستان جام کمال ئسک ہم دورہ ٹی وزیراعظم عمران خان تون اوار ءُ۔ وزیراعظم عمران خان دورہ ٹی چین نا صدر شی جن پنگ و چینی ہم منصب لی کی جیانگ تون اوڑدہی کیک۔ وزیراعظم نا اوڑدہی تے ٹی ہڑتوم آ کنڈآتا تعلقداری و اہم تین پہ تینی معاملہ غاتیا خیال آتا درشانی تون اوار اوار چندی بشخ آتے ٹی معاہدہ و یات داشت آتیا دستخط ہم مریک۔ وزیراعظم شنگھائی ٹی چائنہ انٹرنیشنل امپورٹ ایکسپو نا بنائی دود اٹی بشخ ہلنگ نا وخت آ کلیدی تران کیک۔ چندی پاکستانی مصنوعات آک ہم اول چائنہ انٹرنیشنل امپورٹ ایکسپو نا بشخ مریرہ۔ ایکسپو ٹی وزیراعظم چندی جہانی راہشون آتون اوڑدہی کیک۔ وزیراعظم نا دورہ چین اٹی چین نا بھلا کمپنی تا سروک آتون ہم اوڑدہی کیک۔ پاکستان و چین نا نیام اٹ تاریخی سنگتی و خڑکی تعلقداریک ءُ ہرا ہڑتوم آ سنگت ملک آتا چندی بشخ آتے ٹی اسیجا اصول و تین پہ تینی فائدہ غاتیا کمکاری آٹی ءِ۔ علاقائی امن و سوگوی و معاشی کمکاری ءِ مون آ دننگ کن ہڑتوم آ ملک آتا اسیجا کوشست آتے ٹی گدرینگوک آ وخت اتون اوار اوار پین ودکی مسنے۔ ہڑتوم آ ملک آتا نیام اٹ اقتصادی و صنعتی کمکاری ءِ سی پیک آن پد نمان ودانے۔ وزیراعظم نا چین نا دورہ ہڑتوم آ ملک آتا ساڑی آ اسٹریٹجک تعلقداری تے پین گچین جوڑ کننگ و تین پہ تینی شریداری ءِ مون آدننگ اٹ کمکار جوڑ مریک۔
