وزیراعظم عمران خان نا چین نا دورہ پاکستان نا شونہالی و شونداری نا سفر نا اسہ مزل اس و پوسکن آ پاکستان نا بنداو ءِ تخنگ کن کوشست آتا اسہ اہم ءُ کڑی اسے
اسلام آباد۔ 02نومبر (اے پی پی) بنجائی وزیر اطلاعات و نشریات چوہدری فواد حسین پارینے کہ وزیراعظم عمران خان نا چین نا دورہ پاکستان نا شونہالی و شونداری نا سفر نا اسہ مزل اس و پوسکن آ پاکستان نا بنداو ءِ تخنگ کن کوشست آتا اسہ اہم ءُ کڑی اسے، چین اتون ننا اسٹریٹجک تعلقداری تے ٹی پوسکن ءُ باب اسے نا بنامریک۔ جمعہ نا دے پی ٹی وی نیوز تون ٹیلی فون آ ہیت وگپ کرسا بنجائی وزیر اطلاعات پارے کہ وزیراعظم سعودی عرب نا دورہ ءِ کرے و داسہ چین ہم ہندا سفر نا اسہ مزل اسے ، داپاکستان نا شونہالی و شونداری نا سفر و پوسکن آ پاکستان نا بنداو ءِ تخنگ کن وزیراعظم نا کوشست آتا اسہ اہم ءُ کڑی اسے ۔ دا دورہ نا جتا جہت آک ءُ ہرافتے آن اسہ معاشی ءُ جہت اسے۔ وزیراعظم نا چین اتون اقتصادی پیکج ہرا سی پیک نا دروشم اٹی ءِ، اوٹی کشت وکشار ، روزگار نا وارخواہی و سکل ڈویلپمنٹ ، دا مسہ بنداوی گڑاک اوار مریرہ۔ او پارے کہ چین ننا پت انگا سنگت ءِ ، دورہ ٹی سیکورٹی معاملہ غاتیا ہم ہیت مریک و چین اتون ننا اسٹریٹجک تعلقداری تے ٹی پوسکن ءُ باب اس بناکیک۔ سائنس و ٹیکنالوجی ٹی کمکاری آ ہم ہیت مریک، 2022 ٹی اولیکو پاکستانی سپارکو نا کمک اٹ خلاغا گدریفنگک۔ اسہ سوج اسے نا ورندی ٹی اوپارے کہ ساڑی آ چینی صدر بننگ تون ہی وڈی خوری نا برخلاف اسہ بھاز بھلو تحریک اسے نا بناءِ کریسس و وائٹ کالر کرائم ءِ ہلنگ اٹ چین ہراوڑاٹ ٹیکنالوجی و پوسکن آ جاست وپاستی اسکل آتے کاریم اٹ ایس اوٹی پاکستان ءِ ہیل کننگ کن بھاز گڑاملا انتئے کہ پاکستان اٹی ہم وائٹ کالر کرائم اسہ بھاز بھلو ویل اس مسنے۔ داڑآ ہم سرجم اٹ ہیت مریک۔
