اسلام آباد۔ 02نومبر (اے پی پی) ڈائریکٹر جنرل آئی ایس پی آر میجر جنرل آصف غفور پارینے کہ آسیہ مسیح نا مقدمہ ٹی کانودی وڑوڈول نا رداٹ پٹیشن دائر مسنے ، اوڑآ کانودی کارروائی ءِ چلینگ انگ کن الیبو ، پاکستان نا فوج انا خواہش ءِ کہ امن نا حالیت آتے خراب کننگ آن بیدس داویل ایسر مرے، دھرناٹی فوج انا برخلاف ہیت آک است ہسونی اسے ءُ۔ آئی ایس آئی نا آفیسر مذاکرات کن ہنوک آ حکومتی ڈل انا بشخ ءِ، غٹ آن مست تو حکومت نا زمواری ءِ اوکان پد پولیس و رینجرز و ولدا اگہ پاکستان نا فوج ءِ بٹنگ انگا تو ولدا آرمی چیف تینا مشورہ ءِ ایتک۔ جمعہ نادے ٹی پی وی تون ٹیلی فون آ ہیت وگپ اٹی اوپارے کہ آسیہ مسیح کیس اٹی دائر پٹیشن سپریم کورٹ سماعت کن مقرر کرینے و منہ دے اٹی اونا تاریخ ءِ بروئی ءِ ، دا کیس اسہ کانودی وڑوڈول اسے نا رداٹ ءِ و کنا تینا غٹ دینی جماعت آتیان خواست ءِ کہ داسہ دا پٹیشن آ کانودی کارروائی ءِ چلینگ انگ کن ہلر۔ ڈی جی آئی ایس پی آر پارے کہ گدرینگوک آ منہ دے اٹی ملک اٹی امن وایمنی نا حالیت آک جوڑ مسنو، ننا مذہبی جماعت آک آسیہ مسیح کیس اٹی سپریم کورٹ نا فیصلہ غا ملک اٹی دھرنہ تننگ ءُ ، ہرافتسکان اوفتا احساس آتا ہیت ءِ تو مچ آ پاکستان نا مسلمان تا حضور اکرم ﷺ تون مابت نا رشتہ ءِ، نن اونا امت اُن ، اسہ مسلمان اس ہم حضور اکرام ﷺ تون مابت آ سمجھوتہ کننگ کپک ، حضور اکرم ﷺ نا شان اٹی گستاخی آ نناغٹ انا جوزہ غاک مجروح مریرہ، داٹی تو ہچ ءُ شک اس اف۔ اوپارے کہ آسیہ میسح کیس گدرینگوک آ دہ سال آن عدالت آتے ٹی ءِ ، ہراڑے اول اودے سزامس، او بند مس و داسہ سپریم کورٹ دامقدمہ غا کانودی وڑوڈول نا رداٹ اپیل نا فیصلہ ءِ بنفینے۔ کانودی وڑوڈول نا رداٹ ہی دافیصلہ غان پد ہم اسہ پٹیشن اس دائر مسنے ہر اسپریم کورٹ سماعت کن مقرر کرینے و منہ دے اٹی اونا تاریخ ءِ بروئی ءِ۔ کنا اسہ پاکستانی و مسلمان اس مننگ نا حیثیت اٹ تینا غٹ دینی جماعت آتیان خواست مریک کہ داسہ دا پٹیشن آ کانودی کارروائی ءِ مننگ کن ہلر و ہریر کہ عدالت اوڑآ انت فیصلہ کیک۔ داکانودی عمل ءِ پورو مننگ کن ہلنگے ۔ تحریک لبیک یارسول اللہ نا کنڈآن آپریشن نا بارواٹی اونا پاننگ ئس کہ خادم حسین رضوی صاحب نا بیان ءِ ہرانٹ۔ اوتینٹ ہی پارینے کہ دادھرنہ ٹی پاکستان نا فوج انا برخلاف ہیت مس۔ ملک اٹی امن و ایمنی نا حالیت آک جوڑ ءُ داٹی مذاکرات کن حکومت نا اسہ ڈل اس ہنا۔ آئی ایس آئی نا آفیسر حکومتی ڈل انا بشخ ءِ انتئے کہ آئی ایس آئی وزیراعظم نا انٹیلی جنس انسٹرومنٹ نا بشخ ءِ۔ داوڑنا فیصلہ غاک بھاز مشکل مریرہ ، غٹ آن مست تو حکومت نا زمواری ءِ اوکان پد پولیس و رینجرآک ءُ و ولدا اگہ پاکستان نا فوج ءِ بٹنگ انگا تو ولدا آرمی چیف تینا مشورہ ءِ ایتک ۔ مذاکرات نا مسخت حالیت آتے گچینی نا کنڈآ دننگ نا ءِ۔ حکومت تون مذاکرات اٹی کڑدہ غاک اسہ ایلو نا ہیت ءِ بایدے خف تورر۔
