اسلام آباد۔ 02نومبر (اے پی پی) چین پاکستان اقتصادی راہداری ڈٹ (سی پیک) آن پاکستان اٹی 2030 ء اسکان روزگار نا 7 لکھ آن زیات پوسکن ءُ وارخواہی ودی مریک ہراڑان نیزگاری نا کچ اٹی کمتی و بے روزگاری نا چٹفنگ اٹی کمک رسینگک۔ سی پیک نا رداٹ داوخت آ ملک اٹی جاری 22 جتا ڈٹ آتیا75 ہزار آن زیات پاکستانی روزگار نا دوئی کننگ اٹ لگوک ءُ۔ سی پیک سیکرٹریٹ نا کمامدارآتا رداٹ سی پیک روٹ انا ہڑتوم آ کنڈآتے ٹی انڈسٹریل زون انا جوڑ کننگ ہراٹی کیٹرنگ ، خام مال انا پروسیسنگ ، کارگو ٹرانسپورٹیشن ، مینو فیکچرنگ و پین پین تون اوار جتا کیٹیگری نا انڈسٹری اوار ءُ۔ ٹی لکھ آ ہندی خلقت ءِ روزگار ہم دوبریک۔ اوپاریر کہ سی پیک سنٹر فار ایکسی لینس نا سروے نا رداٹ انڈسٹریل زون تے ٹی کم و ود 12لکھ خلقت ءِ روزگار نا وارخواہی دوبریک۔ اوفک پاریر کہ سی پیک ڈیہہ نا اسیجا شونداری و شونہالی نا ضامن ءِ و پاکستان آخبت اٹی سی پیک ڈٹ انا پوروی آن پد تینا جغرافیائی محل و وقوع نا سوب یورپ و ایشیائی ملک آتا نیام اٹ پول انا کڑد ءِ ادا کیک ہراڑان ڈیہہ نا واپار ، اقتصادی و راجی رابطہ غاتے ٹی ودکی کننگ اٹ کمک رسینگک۔ اوپاریر کہ معاشی وڑاٹ سوگو پاکستان ہی دہشت گردی و انتہاپسندی ءِ شکست تننگ کیک ہراڑان ڈیہہ نا علاقائی امن و سوگوی و شونداری و شونہالی ءِ المی جوڑ کننگ مریک ۔ پاکستان اٹی اقتصادی و صنعتی شونداری کن پاک چین اقتصادی راہداری نا رداٹ اسیجا حکمت عملی اٹ کسب کار افرادی قوت نا دستیابی و ہڑتوم آ ملک آتا کاروباری برادری نا تین پہ تینی رابطہ غاتے ہم مون آ دننگ انگ ءِ۔
