اسلام آباد۔ 01نومبر (اے پی پی) پاکستان و ازبکستان ڈیہہ ٹی امن و سوگوی ءِ مون آ دننگ نا عزم ءِ کرسا ہڑتوم آ ملک آتا نیام اٹ چندی بشخ آتے ٹی کمکاری آ امنا کرینو وخت اس کہ ازبکستان پارینے کہ دہشت گردی نا برخلاف جنگ و ڈیہہ ٹی امن و سوگوی ٹی پاکستان نا اہم ءُ کڑد اسے۔ داخیال آتا درشانیءِ وزیر خارجہ شاہ محمود قریشی و اونا ازبک ہم منصب عبدالعزیز کامیلوف پنچ شنبے نادے داڑے دفترخارجہ ٹی ون آن ون اوڑدہی آن پد اسیجا پریس کانفرنس آن تران کرسا کریر۔ وزیر خارجہ شاہ محمود قریشی پارے کہ ہڑتوم آملک آک اوغان جھیڑہ نا سیاسی ایسری آ اسہ وڑ نا موقف تخرہ انتئے کہ اوغان جھیڑہ نا ہچ ءُ فوجی ایسری اس اف۔ پاکستان الس نا فائدہ کن ڈیہہ ٹی رابطہ غاتے مون آ دننگ کن تیار ءِ۔ شاہ محمود قریشی پارے کہ واپار ، سیل و سوات و سیکورٹی نا بشخ آتے ٹی ہڑتوم آ کنڈآتا کمکاری ٹی ودکی نا بے پناہ وارخواہی ارے۔ شاہ محمود قریشی ازبکستان نا صدر شوکت مرزیوف نا کنڈآن وزیراعظم پاکستان عمران خان ءِ گدریفوک آ چھٹی نا ذکر ءِ کرسا پارے کہ داڑآن ہڑتوم آ کنڈآتا تعلقداری تے اسہ پوسکن ءُ رُخ اس ملا و ریل و روڈ رابطہ غاتا سلاہ غاک ہڑتوم آ ملک آتا نیام اٹ گپ و تران کن کسر ءِ آوار کرینو۔ اوپارے کہ ہڑتوم آ ملک آک سیکورٹی نا بابت معاملہ غاتیا ہم کمک کننگ ءُ، ہرانا شاہدی دادے کہ ازبک وزیر خارجہ نا پنچ باسکی ڈل اٹی ازبک نیشنل سیکورٹی نا سروک ہم اوار ءِ۔
