اسلام آباد۔ 01نومبر (اے پی پی) بنجائی وزیر تعلیم و تربیت شفقت محمود پارینے کہ عمران خان تدوک آ دے روڈ ءِ بند کروک آتا برخلاف دلیری نا موقف اس اختیار کرے ، گدرینگوک آ دور تے ٹی دُن انگا حالیت آتیا ہمووخت انا حکمرانک ہچ کتورہ و اوفتیا خوف اس طاری مسکہ، عمران خان نا داگام گیج نا بایدے ستاءِ کننگے۔ پنچ شنبے نادے قومی اسمبلی ٹی خورشید شاہ نا اعتراضی ٹک انا ورندیءِ ترسا بنجائی وزیر شفقت محمود پارے کہ سپریم کورٹ فیصلہ تس، حکومت نا زمواری ءِ کہ دافیصلہ غا عملدرآمد کرفنگے، نن خواپنہ کہ دا فیصلہ غا سیاست کننگے، افسوز ءِ کہ دا معاملہ غا سیاست کننگا۔ خورشید شاہ ریاست نا عملداری ءِ چیلنج کروک آتا مذمت ءِ کتو۔ بلاول بھٹو دامعاملہ نا بارواٹ واضح موقف تخک۔ خورشید شاہ بایدے داڑے سلسا دامعاملہ نا مذمت ءِ کروسس۔
