اسلام آباد۔ 01نومبر (اے پی پی) جرمنی نا پنی آ کمپنی تا اسہ پڑ اس پاکستان اٹی قابل تجدید توانائی نا ڈٹ آتون اوار بجلی نا بشخ وپانٹ نا نظام ءِ گچین جوڑ کننگ اٹی است خواہی نا درشانیءِ کرینے۔ جرمنی نا داکمپنی تا نمائندہ غاتیا تالان ڈل پنچ شنبے نادے داڑے بنجائی وزیر پاور ڈویژن عمر ایوب خان تون اوڑدہی کرے۔ داوخت آ بنجائی سیکرٹری پاور ڈویژن عرفان علی ہم ساڑی ئس۔ بنجائی وزیر ڈل ءِ پارے کہ حکومت گچین پالیسی سازی و پوسکن آ ٹیکنالوجی نا کاریم اٹ اتنگ نا کمک اٹ بجلی نا بشخ انا چیلنج آتا مون ءِ توننگ نا کوشست کننگ ءِ و داچرجوئی ٹی پوسکن آ گریڈ نا نظام، سمارٹ میٹرز و اے بی آن کنڈکٹر نا تنصیب اہم ءُ گام گیج ءُ ہرافتیا عمل کننگک۔ اوپارے کہ حکومت زرکاری کن دوئی ڈٹ آتا فہرست ءِ پرائیویٹ پاور انفراسٹرکچر بورڈ انا ویب سائٹ آ جاری کننگ نا ارادہ تخک۔ و داٹی است خواہی ہلوک آ کمپنیک آن لائن نظام نا کمک اٹ داڈٹ آتے کن درخواست تننگ کیرہ داڑآن معاملہ غاتے شفاف جوڑ کننگ و زرکار آتے آسانی فراوان کننگ اٹ کمک رسینگک۔ اوپارے کہ صاف وپائیدار وسیلہ غاتا کمک اٹ توانائی نا گرج آتے پورو کننگ کن متبادل توانائی نا ڈٹ آتے اہمیت تننگ انگ ءِ۔
