اسلام آباد۔ 01نومبر (اے پی پی) کاروبار اٹی آسانی نا لحاظ اٹ جہانی درجہ بندی ٹی پاکستان نا رینکنگ اٹی 11درجہ گچینی بسنے۔ جہانی بینک انا سال 2019 ء کن کاروبار اٹی آسانی نا بابت جاری کروک رپورٹ نا رداٹ پاکستان 11 درجہ گچینی اتون 136می نمبر آ بسنے۔ جہانی بینک انا کنڈآن جاری اسہ بیان اسے ٹی پاننگانے کہ گچین وڑوڈول آتا کنڈآ پیش رفت کرسا پاکستان نا اسکور گدرینگوک آ سال 52.78 نا مقابلہ ٹی داسال 55.31 مسنے۔ دا گچینی کاروبار اٹی آسانی نا بابت درکار اصلاحات آتا سوب آن بسنے ہرا روزگار و زرکاری ٹی و معیشت ءِ پین مسابقتی جوڑ کننگ کن کننگانے۔ گدرینگوک آسال انا اصلاحات ، کاروبار نا بنا، پراپرٹی نا رجسٹریشن و ویل آتا ایسری نا بابت ءِ۔ رپورٹ نا رداٹ سویلی ایشیائی ہمسایہ ملک آتا نیام اٹ پاکستان نا اوسط سکور 56.71ءِ وخت اس کہ چین نا 73.6، بھارت نا 67.23 و بنگلہ دیش نا 41.97ءِ۔ رپورٹ اٹی پاننگانے کہ گدرینگوک آ سال پاکستان اٹی آن لائن رجسٹریشن سسٹم چندی فارم تے اسہ درخواست اسے ٹی بدل کننگ و رجسٹری و خراج اتھارٹی نا نیام اٹ معلومداری نا تبادلہ نا پروگرام اس درستی راستی کرفنگ آن کاروبار بنا کننگ نا عمل ءِ آسان جوڑ کننگا۔ دا گام گیج آتے ٹی پاکستان اٹی کاروبار بناکننگ نا مد 20 دے آن کم مرسا 17 دے اسکان بسنے وخت اس کہ کاروبار نا خڑچ 7.9 درسد آن کم مرسا 6.8 درسد مسنے۔ رپورٹ نا رداٹ دا اصلاحات کاروبار اٹی آسانی نا بابت جانچ کروک آ اِرا بھلا شار کراچی و لاہور اٹی نافذ کننگانے۔ ہنداوڑ پراپرٹی نا رجسٹریشن نا بشخ اٹی ہم گچینی اتنگانے۔ جہانی بینک انا کنٹری ڈائریکٹر پاکستان دا بابت پارے کہ بنجائی و صوبائی کہول آتیا نمان اصلاحات اٹ گچینی بسنے۔ اینو پاکستان اٹی چنکا و درمیانہ درجہ نا کاروبار نا مالک آتے کن حالیت آک گچین ءُ۔ پاکستان کن ملک اٹی ریگولیٹری انوائرمنٹ ءِ بدل کننگ و اسہ مسابقت آ مبنی کاروباری چاگڑد ودی کننگ ممکن ءِ ولے دامسخت کن ساڑی آ گچینی تے برقرار تخسا دارداٹ ترندی اتوئی ءِ۔ رپورٹ اٹی مستی پاننگانے کہ پاکستان اقلیتی زرکار آتا رکھ اکن گچین اصلاحات کرینے و دا بشخ اٹی ملکیت و انتظام نا انڈیکس اٹی 10 آن 9پوائنٹ دوئی کرینے۔
