اسلام آباد۔ 31اکتوبر (اے پی پی) مزن وزیر عمران خان ءَ گوں ایران ءِ وزیر ءِ درئی کار ڈاکٹر جواد ظریف ءَ چار شمبے ءَ ادا گند ءُُ نند کت۔ ایرانی وزیر ءِ درئی کار پاکستان ءِ سرکاری تر ءُُ تاب ءَ اِنت۔ ایران ءِ وزیر ءِ درئی کار ءَ مزن وزیر عمران خان ءَ را مزن وزیر ءِ سیٹ ءِ گرگ ءِ پد ءَ ایران ءِ صدر حسن روحانی ءِ نیمگ ءَ چہ مبارکی دیان ءَ گوشت کہ ایران دوئیں ملک آنی وت مہ وتی یکوئی آناں گیش ودینگ ءَ جزمیگ اِنت۔ ایران ءِ صدر حسن روحانی ءِ کلوہ ءِ رد ءَ درشان کنان ءَ مزن وزیر ءَ ایران ءِ گوما سیاسی ءُُ اقتصادی رابطہ آناں گیش برجم کنگ ءِ واھشت ءِ درشان کت۔ مزن وزیر ءَ گوشت کہ توامیں ھمساھگیں ملک آنی گوما جوانیں یکوئی آناں گہتر کنگ آئی ءِ حکومت ءِ درئی پالیشی ءِ المی ایں بھر اِنت۔ اے موہ ءِ سر ءَ پاک۔ ایران دو نیمگی یکوئی آناں گیش ودینگ، دمگی ءُُ میاں اوستمانی کار آنی سر ءَ ھیال ریچی کنگ بوت۔ مزن وزیر ءَ مسلمانیں ملک آ نی جیڈھ ءُُ یکوئی ءِ نہ بوھگ ءِ پد ءَ نہ وشی ءِ درشان کت۔ اے بابت ءَ آئی ءَ یمن ءِ مردم آنی جیڈح ءُُ بنی آدم آنی ھک آنی لگت مالی ءِ تران کت۔ آئی ءَ یمن ءِ جیڈھ ءِ گیواری ءِ واستہ زاتی جہد آناں سہرا کنان ءَ گوشت کہ توامیں سیادی داروکیں پریک ایشی ءِ سر ءَ رضامند بہ بنت گڈا پاکستان جیڈھ ءِ گیواری ءِ واستہ کرد ءَ پیلو کت کنت۔ مزن وزیر عمران خان ءَ ایران ءِ سروک ءُُ اُلس آنی واستہ نیکیں واھگ آنی درشان کت۔
