اسلام آباد۔ 31اکتوبر (اے پی پی) بنجائی وزیر ڈٹ بندی ، شونداری و اصلاحات مخدوم خسرو بختیار پارینے کہ توانائی نا بشخ اٹی زرکاری نا بھلو کچ اسے آ وارخواہی ارے، متحدہ عرب امارات دا بشخ آتے ٹی زرکاری کرسا فائدہ ہرفنگ کیک، پاکستان پیشن نا ملک آتا زرکار آتے کن دوستانہ پالیسی اس مرتب کرینے۔ داخیال آتا درشانی ءِ او متحدہ عرب امارات نا سفیر حماد عبید الزابی تون اوڑدہی ٹی کرے۔ بنجائی وزیر مخدوم خسرو بختیار پارے کہ پیٹرو کیمیکل و دیر آن بجلی ودی کننگ نا بشخ آتے ٹی زرکاری نا بھلو کچ اسے آ وارخواہی ارے۔ پاکستان و یو اے ای نا نیام اٹ برادرانہ تعلقداری ءِ و ننا کوشست ءِ کہ تین پہ تینی تعلقداری تے پین ودفنگے۔ متحدہ عرب امارات نا پارکو ٹی زرکاری ءِ قدر انا نظر اٹ ہرک۔ اواومیت ظاہر کرے کہ تین پہ تینی معاشی کمکاری ءِ پوسکن ءُ جہت اس تننگ کن پوسکن ءُ کسر پٹنگک۔ پاکستان دبئی ٹی اڈہلوک آ ایکسپو 2020 اٹی پبی وڑاٹ بشخ ہلیک۔ اوپارے کہ ایکسپو 2020 ء ہڑتوم آ ملک آتا نیام اٹ آخبت اٹی تین پہ تینی کمکاری نا چاگڑد ءِ پین سوگو کیک۔ ہڑتوم آ ملک آتا تین پہ تینی تعلقداری تے سوگو کننگ کن بڑزکو کہول انا ڈل آتا ہن و بر المی ءِ۔ متحدہ عرب امارات نا شونداری ٹی پاکستانی کمیونٹی نا کڑد بھاز اہم ءِ و داہڑتوم آ ملک آتا نیام اٹ پول انا کڑد ءِ ادا کننگ ءُ۔ اومیت ءِ کہ متحدہ عرب امارات سویلی پنجاب اٹی انسانی ہمدردی نا ڈٹ آتا ہم بناءِ کیک۔ داوخت آ یو اے ای نا سفیر حماد عبید الزابی پارے کہ ہڑتوم آ ملک آتا نیام اٹ ہڑتوم آ کنڈآتا تعلقداری اسہ جتا ءُ حیثیت اس تخک۔ آخبت اٹی دا تعلقداریک سنگتی نا پوسکن آ بڑزی تسکان سرمریرہ ۔ سفیر بنجائی وزیر ءِ فروری ٹی متحدہ عرب امارات اٹی مروک آ گورنمنٹ سمٹ اٹی ساڑی مننگ نا سلہ ہم خلک۔
