اسلام آباد۔ 31اکتوبر (اے پی پی) چین پاکستان اقتصادی راہداری ڈٹ(سی پیک) نا رداٹ سندھ اٹی چائنہ اسپیشل اکنامک زون دھابیجی زون آ کاریم ترندی اٹ برجاءِ، دا زون اکن اسہ ہزار ایکڑ ڈغار دوئی کننگانے و صنعتی بستی کن گام گیج آتا چرجوئی ترندی اٹ برجاءِ۔ وزارت ڈٹ بندی ٹی سی پیک سیکرٹریٹ نا کمامدارآک اے پی پی ءِ پاریر کہ سندھ اٹی چائنہ اسپیشل اکنامک زون دھابیجی زون اٹی جتا انڈسٹری تے اتنگ انگ ءِ۔ اوپاریر کہ دا صنعتی زون آن بالی پٹ انا فاصلہ 80 کلومیٹر، 85کلومیٹر بندرگاہ ، 5کلومیٹر ریلوے اسٹیشن آن و 4.5 کلومیٹر ہائی وے آن ءِ۔ اوپاریر کہ دا علاقہ ٹی صنعتی زون نا جوڑ کننگ نا سلاہ و سوج سندھ حکومت نا کنڈآن بسوسس و داٹی بنجائی حکومت نا کنڈآن ہچ ءُ مداخلت اس کننگتنے۔ کمامدارآتا رداٹ سی پیک نا ارٹ میکو مرحلہ نا رداٹ پاکستان اٹی چین نا کمک اٹ صنعتی انقلاب اس اتیک، دامرحلہ ٹی ملک انا ہرچار آ صوبہ ، گلگت بلتستان ، فاٹا و آزاد کشمیر اٹی جم وڑاٹ 9 صنعتی زون جوڑ کننگک۔
