اسلام آباد۔ 30اکتوبر (اے پی پی) بنجائی وزیر اطلاعات و نشریات چوہدری فواد حسین پارینے کہ اپوزیشن جماعت آتا اے پی سی بیرہ این آر او ہلنگ کن کرفنگ انگ ءِ، نواز شریف نا سیاست چٹانے، داسہ او پارلیمنٹ ہاؤس نا خلقت تون بیرہ ملنگ کن بننگ کیک، وزیر مملکت داخلہ ہم آئی جی اسلام آباد نا کاریم آ است جم مفننگ نا درشانی ءِ کرسا وزیراعظم ءِ غاو تسنے ، بیوروکریسی ٹیلی فون ءِ ہرفپننگ نا روایت آ چلینگک تو حکومتی معاملہ غاک چلینگ انگ کپسہ، بیوروکریسی ءِ السی نمائندہ غاتا مون آ جوابدہ جوڑکروئی مریک، اگہ بیوروکریٹ آتے ہی حکومت کروئی ءِ تو حکومت ءِ اوفتا حوالہ کینہ، گچین کاری تا کرفنگ نا انت ضرورت اسے، وزیراعظم ءِ اختیار ارے و اوانا کاریم اٹ اتنگ اٹی او حق بجانب ءِ، پاکستان نا نادہندہ مننگ نا خلیس چٹانے، وزیراعظم نا چین نا دورہ غان پد ملک انا اقتصادی حالیت آتے ٹی پین گچینی بریک۔ السی غاوک پورٹل آ داوخت اسکان اسہ لکھ غاو ملانے ہرافتیان 50ہزار پنجاب آن و 20 ہزار سندھ آن ملانو، عمران خان بنی گالہ ٹی 30 سال مست ہراتم اُراس جوڑ کرے، ہمووخت آ داعلاقہ اسلام آباد نا دنگ اٹی بتوکہ ہراڑکن تعلقدار یونین کونسل آن موکل ہلنگاسس۔ سے شنبے نادے پارلیمنٹ ہاؤس نا پیشن میڈیا تون ہیت وگپ کرسا بنجائی وزیر اطلاعات و نشریات پارے کہ وزیراعظم عمران خان نا پیشن نا ملک انا دورہ غاتا سرسہبی نا سوب اسٹاک مارکیٹ اٹی کاروبار نا کچ اٹی ودکی مسنے۔ اِرادے اٹی اسٹاک مارکیٹ اٹی 1450 پوائنٹ نا ودکی مس ہرااسہ دہائی ٹی غٹ آن زیات ودکی ءِ۔ سرسہب درملکی دورہ غاتا سوب پاکستان اٹی زرکاری کن سازگار چاگڑد اس جوڑ ءِ ہرا داہیت انا شاہدی ءِ کہ ملکی و جہانی زرکارآک حکومت نا پالیسی تیا پت انا درشانی ءِ کننگ ءُ۔ وزیراعظم نا چین نا دورہ غان پد ملک انا اقتصادی حالیت آتے ٹی پین گچینی بریک۔ نواز شریف و آصف زرداری ملک ءِ ہراگرداب اٹی اختہ کریسر ملک اوڑآن پیش تمنگ ءِ۔ نن السی و جہانی اومیت آتیا پورو سلسا نشان ایتنہ ۔ 70 دے اٹی حکومت نا تنظیم سازی مفک نن داخہ کاریم کرینن نشان تسونن۔ اوپارے کہ وزیراعظم گورننس اٹی گچینی کن پوسکن ءُ ٹیکنالوجی اس کاریم اٹ اتنگ نا فیصلہ کرینے و السی غاوپورٹل نا بناءِ کرینے۔ اوپارے کہ یک شنبے نادے الس ءِ غا و پورٹل نا کاریم آن معلومدار کینہ۔ غاو پورٹل نا کمک اٹ وزیراعظم غٹ ادارہ غاتا کارکڑد آ نظر تخنگ کیک و ہراڑے المی مس پارت ایتک۔ وزیراطلاعات پارے کہ آئی جی اسلام آباد نا تبادلہ نا معاملہ سینیٹر اعظم سواتی نا اف۔ داکان مست وزیر مملکت داخلہ شہریار آفریدی ہم آئی جی اسلام آباد نا کاریم آ است جم مفننگ نا درشانی ءِ کرسا وزیراعظم ءِ غاو تسنے۔ اسلام آباد نا اسکول و کالج آتے ٹی آئس و منشیات کل انا مون آ بہامننگ ءِ و اسلام آباد پولیس ہچ ءُ کارروائی اس کننگ اف۔ اسلام آباد نا تھانہ غاتے ٹی و ناکہ غاتیا رشوت ہلنگ نا غاو ہم ملانے ۔ داڑآ ایکشن ہلپننگ آ شہریار آفریدی ہم آئی جی اسلام آباد آن ناراض ئس۔ آئی جی اسلام آباد وزیراعظم ءِ جواب دہ ءِ۔ داملک اٹی شریف خاہوت بادشاہت نا نظام ءِ رائج کریسر ہرانا سوب بیوروکریسی ءِ ہم بھاز انگا ویل آتا مون تروکی ءِ۔ فواد چوہدری پارے کہ وزیراعظم عمران خان بنی گالہ ٹی 30 سال مست ہراتم اُراس جوڑ کرے تو ہمووخت آ داعلاقہ اسلام آباد نا دنگ اٹی بتوکہ ہراڑکن تعلقدار یونین کونسل آن موکل ہلنگاسس۔ اوپارے کہ پبلک اکاؤنٹس کمیٹی نا کماشی ءِ شہباز شریف ءِ تفنہ۔ ویل دادے کہ اپوزیشن تون ہچ ءُ پاک صاف ءُ بندغ اس ہی اف ہراڑآ نیب انا مقدمہ غاک مفس۔ نن خوانہ کہ ہندن ءُ بندغ اسے پی اے سی نا کماشی ءِ تننگ خوانہ ہراکرپشن اٹ ملوث مفئے۔
