اسلام آباد۔ 30 اکتوبر (اے پی پی) وزیر خارجہ شاہ محمود قریشی اسرائیلی جہاز انا پاکستان آ بننگ ءِ من گھڑت و بے بنداو گوندسا پارینے کہ داہیت اٹی ہچ ءُ راستکی اس اف ، سعودی عرب ہراپیکج ءِ تسنے اوٹی ہچ ءُ شڑت اس اوار اف۔ سے شنبے نادے قومی اسمبلی ٹی سردار ایاز صادق نا کنڈآن چست کروک ٹک انا ورندی ءِ ترسا وزیر خارجہ شاہ محمود قریشی پارے کہ اسرائیلی جہاز نا پاکستان آ بننگ نا خبر من گھڑت، بے بنداو ءِ۔ اونا وزارت خارجہ و سول ایوی ایشن اتھارٹی نا کنڈآن وار وار وضاحت کننگانے کہ داٹی ہچ ءُ راستکی اس اف۔ اوپارے کہ سعودی عرب تون پیکج نا چرجوئی ٹی ہچ ءُ شڑت اس اوار اف نئے پاکستان فوج ءِ گدریفنگ ءِ۔ اوپارے کہ داوخت مسلم امہ بشخ و پانٹ ءِ و دا پاکستان نا مفاد اٹی ءِ کہ او دا خلیج ءِ کم کے۔ اگہ دارداٹ پاکستان کڑد اس ادا کننگ کیک تو اوداے دابایدے کروئی مرے۔ اوپارے کہ اقتصادی جاچ ءِ وزیر خزانہ پیش کے و اوڑآ اپوزیشن تینا سلاہ و سوج آتے ایتے۔ اوفتے وزارت خزانہ نوٹ کیک و اوفتے مون آ تخسا گام گیج چست کننگک۔
