قومی اسمبلی دیوان، حکومت نا اسہ وار ولدا اپوزیشن ءِ ملک انا معاشی حالیت آتا گچینی کن معاشی معاہدہ نا سلہ
اسلام آباد۔ 30اکتوبر (اے پی پی) قومی اسمبلی ٹی حکومت اسہ وار ولدا اپوزیشن ءِ ملک انا معاشی حالیت آتا گچینی کن معاشی معاہدہ نا سلہ خلکونے وخت اس کہ وزیر خارجہ شاہ محمود قریشی نا پاننگ ءِ کہ ہراوڑ ملک انا سیاسی سرکڑدہ غاک پامداری نا درشانی ءِ کرسا میثاق جمہوریت کریسر ہمووڑ ملک ءِ مون تروک اقتصادی چیلنج آتیان کشنگ کن معاشی معاہدہ کننگے، اپوزیشن پارینے کہ او ملکی فائدہ غاتیا سیاست کپسہ ومعیشت نا گچینی کن تینا سلاہ و سوج آتے ایترہ ، ملک اٹی چل سال راج مسنے ، اونا دور انا ہم حساب ءِ ہلنگے۔ سے شنبے نادے قومی اسمبلی ٹی سید خورشید شاہ اعتراضی ٹک آ پارے کہ کورم نا پیدواری تکلیف دہ ءِ ، داایوان نا کارروائی بایدے چلینگے، ای اپوزیشن تون پاریٹ کہ دا پیدواری بایدے مف ولے داحکومت نا زمواری ءِ کہ او کورم ءِ پورو کے۔ نن خوانہ کہ پاکستان شونہال مرے۔ الس شونہال مرے ، ملک شون ہلے، کڑز کون آ لعنت آن جان چٹے۔ داخہ بھلو شرہ اسے ٹی اگہ حکومت کورم ءِ پورو کننگ کپ تو دا افسوزناک ءِ۔ حکومت آن خواست ءِ کہ او دیوان نا بناغا کورم ءِ پورو کے۔ نن پبی کمک کینہ۔ اپوزیشن کورم نا پیدواری ءِ کرسا پوائنٹ سکورنگ کننگ خواپک۔ اونا ورندی ٹی وزیر خارجہ شاہ محمود قریشی پارے کہ خورشید شاہ سہی پیدواری کرینے ، کورم ءِ پورو کننگ حکومت نا زمواری ءِ۔
