اسلام آباد۔ 30اکتوبر (اے پی پی) بنجائی وزیر ریلوے شیخ رشید احمد نا پارت آ الس نا آسراتی نا رداٹ کراچی آن دھابیجی نا نیام اٹ پگہ یکم نومبر آن دھابیجی ایکسپریس نا پن اٹ پوسکن ءُ شٹل ٹرین اس بناکیک۔ پوسکن آ ٹرین انا بناءِ اینو بیگہ نا 4بجہ غا کراچی کینٹ آن مریک ۔ کراچی دھابیجی ایکسپریس (1UK-KD) کراچی سٹی آن سہب انا ہفت بجہ غا رادہ مرسا ڈرگ روڈ، ملیر و بن قاسم اسٹیشن آ اسٹاپ کرسا 8بجہ ءُ 55منٹ آ دھابیجی ریلوے اسٹیشن آ سرمریک۔ ہنداوڑ دھابیجی کراچی ایکسپریس (2DN-DK) بیگہ نا 5بجہ غا دھابیجی ریلوے اسٹیشن آن رادہ مرسا بن قاسم، لانڈھی و ملیر ریلوے اسٹیشن آ اسٹاپ کرسا 6بجہ ءُ 55منٹ آ کراچی سٹی ریلوے اسٹیشن آ سرمریک ۔ داشٹل ٹرین ہفت اکانومی کلاس کوچز، اسہ پاور وین و اسہ بریک وین اسے آ تالان مریک۔ ساڑی آ حکومت نا کنڈآن داپوسکن آ شٹل ٹرین کراچی نا مزور تپہ کن اسہ ٹیکی اسے۔ داٹرین آن کراچی نا خواری کش آتے سہب انا فیکٹری ایریا، لانڈھی، کورنگی و دھابیجی آہِننگ و بننگ اٹی بھلو آسراتی اس ملک۔ بنجائی وزیر ریلوے شیخ رشید احمد نا پاننگ ءِ کہ وزیراعظم پاکستان نا کنڈآن کراچی نا خلقت کن لوکل ٹرین نا اسہ وعدہ اس کریسس ہرادے پورو کننگ انگ ءِ۔ اومستی پارے کہ دا 60 دے اٹی ششمی ٹرین ءِ انشاء اللہ 100 دے اٹی 10 پسنجر ٹرین و 15فریٹ ٹرین نا ٹارگٹ ءِ ہم پورو کینہ و پاکستان ریلوے قوم انا است خواہی تیا پورو سلک۔
